މަންޒިލެއްގެ ގޮތުގައި ރާއްޖޭގެ ފަތުރުވެރިކަން އިސްތިހާރިކުރުމަށް ބޭންކް އޮފް މޯލްޑިވްސްއިން "އެކްސްޕީރިއަސް މޯލްޑިވްސް" ނަމުގައި ކެމްޕެއިނެއް ފަށައިފިއެވެ.

މިއީ ބީއެމްއެލްގެ ކާޑު ހިދުމަތެއްކަމަށްވާ އެމެރިކަން އެކްސްޕްރެސް އާ ގުޅިގެން ރާއްޖޭގެ ފަތުރުވެރިކަން އެމެރިކަން އެކްސްޕްރެސް ކާޑު މެމްބަރުންނަށް މާކެޓް ކުރުމުގެ ގޮތުން ފެށި ކެމްޕެއިނެކެވެ. ބީއެމްއެލުން ބުނީ ދެ އަހަރުގެ މުއްދަތަށް ކުރިއަށްގެންދާ މި ކެމްޕެއިނުގެ ދަށުން އެމެރިކަން އެކްސްޕްރެސް ކާޑު ގެންގުޅޭ ކަސްޓަމަރުންނަށް އެކި ރިސޯޓްތަކުންނާއި ސަފާރީތަކާއި މާޗަންޓްތަކުން ހާއްސަ އޮފާތައް ލިބިގެންދާނޭކަމަށެވެ. މީގެ އިތުރުން ސްޕާ ޓްރީޓްމަންޓް، ބީޗް ޑައިނިން، މޫދުކުޅިވަރު ހަރަކާތްތަކާއި ފްލޯޓިން ބްރޭކްފާސްޓް، ރޫމް އަޕްގްރޭޑިންގެ އިތުރުންވެސް ލޯކަލް އެޑްވެންޗަރ ފަދަ ތަޖުރިބާތައްވެސް ފަސޭހަކަމާއެކު ލިބޭނޭކަމަށެވެ.

ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވީ މި ކެމްޕެއިނުގެ ތެރެއިން ރާއްޖެ އަންނަ ފަތުރުވެރިންގެ ތެރެއިން އެމެރިކަން އެކްސްޕްރެސް ކާޑު ގެންގުޅޭ ފަރާތްތަކަށް ހާއްސަ އޮފާތަކާއެކު ރާއްޖޭގެ ރީތި މަންޒިލްތަކާއެކު ތަފާތު ތަޖުރިބާތައް ކޮށްލުމުގެ މަގުފަހިވެގެންދާނޭކަމަށެވެ. 

އެކްސްޕީރިއަންސް މޯލްޑިވްސް ކެމްޕެއިން ލޯންޗްކުރުމުގެ ތެރެއިން... ފޮޓޯ: ބީއެމްއެލް

ޝަރީފް ވިދާޅުވީ މި ކެމްޕެއިނުގެ ދަށުން ލަގްޒަރީ ޓޫރިޒަމްގެ އެންމެ މަގްބޫލު މަންޒިލެއްގެ ގޮތުގައި ރާއްޖެ އިތުރަށް ވަރުގަދަވެގެން ދާނޭކަމަށެވެ. އަދި ރާއްޖެ އިސްތިހާރުކުރުމުގެ ކަންކަންވެސް މާޗަންޓުންނާއެކު ކުރެވިގެންދާނޭކަމަށްވެސް ޝަރީފް ފާހަގަކުރެއްވިއެވެ.

އެމެރިކަން އެކްސްޕްރެސްގެ ގްލޯބަލް ނެޓްވަރކް ސާވިސަސް، އޭޝިއާ އެންޑް ސައުތު ޕެސިފިކް ގްރޯތް މާކެޓުގެ ނައިބު ރައިސް އަދި ޖެނެރަލް މެނޭޖަރު  ދިވްޔާ ޖެއިން ވިދާޅުވީ ރާއްޖެއަކީ ޓޫރިޒަމްގެ މަގްބޫލު މަންޒިލެއް ކަމަށެވެ. އެމެރިކަން އެކްސްޕްރެސްއިން ރާއްޖޭގެ ޓޫރިޒަމް ވިޔަފާރިތަކާއި އަދި އެނޫންވެސް ސްޓޭކް ހޯލްޑަރުންނާއެކު އޮންނަ ގުޅުން ވަރުގަދަ ކުރަމުންދާކަން ފާހަގަކުރައްވަމުން އޭނާ ވިދާޅުވީ މި ކެމްޕެއިނުގެ ސަބަބުން ލަގްޒަރީ މަންޒިލެއްގެ ގޮތުގައި ރާއްޖެ އިތުރަށް ޕްރޮމޯޓް ކުރެވިގެންދާނޭކަމަށެވެ.

ބީއެމްއެލުން މި ކެމްޕެއިން ކުރިއަށްގެންދަނީ ޓޫރިޒަމް މިނިސްޓްރީ ޓޫރިޒަމް ވިޔަފާރިތަކުގެ އެއްބާރުލުމާއެކުއެވެ. ބީއެމްއެލުން ވަނީ މީގެ ކުރިން 2017، 2019 އަދި 2023 ވަނަ އަހަރުވެސް އެކްސްޕީރިއަންސް މޯލްޑިވްސް ކެމްޕެއިން ކުރިއަށްގެންގޮސްފައެވެ.