އދ.ފެންފުށީގައި ބީއެމްއެލް އޭޓީއެމްގެ ހިދުމަތްދޭން ފަށައިފި
އަދ.ފެންފުށީގައި ބޭންކް އޮފް މޯލްޑިވްސްއިން ގާއިމްކުރި އޭޓީއެމްގެ ހިދުމަތް މިއަދު ރަސްމީކޮށްދޭން ފަށައިފިއެވެ.
ފެންފުށީގައި އޭޓީއެމްގެ ހިދުމަތް ބީއެމްއެލުން ރަސްމީކޮށް ފަށާފައިމިވަނީ މިހާރު ރައީސުލްޖުމްހޫރިއްޔާ ޑރ.މުހައްމަދު މުއިއްޒު އދ އަތޮޅަށް ކުރައްވަމުން ގެންދަވާ ޒިޔާރަތުގެ ތެރެއިން މިއަދު އެރަށަށް ވަޑައިގެންނެވި ދަތުރުފުޅުގެ ތެރެއިންނެވެ. އޭޓީއެމް ބޭނުންކުރުން ފައްޓަވައިދެއްވީ ރައީސް ޑރ.މުހައްމަދު މުއިއްޒެވެ. އޭޓިއެމުން ފައިސާ ނެގުމަށްފަހު ރައީސް ވަނީ ފައިސާ ނެގި ކާޑު، ފެންފުށީ ކައުންސިލަށް އަރުވާފައެވެ.
ބީއެމްއެލުން ބުނީ ފެންފުށީގައި ގާއިމްކުރި އޭޓީއެމަކީ ސެލްފް ސާވިސް އޭޓީއެމެއް ކަމަށެވެ. އެގޮތުން އެ އޭޓީއެމް މެދުވެރިކޮށް 24 ގަޑިއިރު ފައިސާ ނެގުމާއި ޖަމާކުރުމުގެ ހިދުމަތުގެ އިތުރުންވެސް އިތުރު ހިދުމަތްތައް ލިބޭނޭ ކަމަށެވެ.
ބީއެމްއެލުން ރަށްރަށުގައި އޭޓީއެމް ބެހެއްޓުމަށް ކުރަމުންގެންދާ މަސައްކަތުގެ ދަށުން މިހާތަނަށް 15 އަތޮޅެއްގެ ހުރިހާ ރަށެއްގައި ވަނީ އޭޓީއެމް ބަހައްޓާ ނިންމާފައެވެ.
މުޅި ރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމް ބެހެއްޓުމަކީ އަދުގެ ސަރުކާރުގެ ސިޔާސަތެކެވެ.
Advertisement
This content is created and paid for by advertisers and does not involve Voice Journalists
