ފޮރިން އިންވެސްޓްމަންޓް އައު އުސޫލުތަކާއެކު ރާއްޖޭގައި ބިދޭސީން ކުރަމުން އައި ބައެއް ވިޔަފާރިތައް މަނާވެއްޖެއެވެ.
ފޮރިން އިންވެސްޓްމަންޓާ ބެހޭ އައު ޤާނޫނެއް އެކުލަވާލައި އެ ޤާނޫނު ތަސްދީގުކޮށްފައިވަނީ މިދިޔަ އަހަރުގެ ސެޕްޓެމްބަރުމަހުގެ ތެރޭގައެވެ. އައު ޤާނޫނުގެ ދަށުން ހަދާފައިވާ ގަވާއިދުގައި ބިދޭސީންނަށް އިންވެސްޓްކުރެވޭނޭ އައު އުސޫލްތަކެއް ވަނީ ކަނޑައަޅާފައެވެ. އިކޮނޮމިކް މިނިސްޓްރީން މިއަދު ވަނީ އެ އުސޫލްތައް އާއްމުކޮށް ގެޒެޓްކޮށްފައެވެ.
އައު އުސޫލްތަކާ ގުޅޭގޮތުން އިކޮނޮމިކް މިނިސްޓަރު މުހައްމަދު ސައީދު ވިދާޅުވެފައިވަނީ، އައު އުސޫލްތަކާއެކު ދިވެހިންނަށް އިތުރު ފުރުސަތެއް ލިބިގެންގޮސް އިގްތިސާދުގައި އިންވެސްޓްކުރުމަށް ފަހި ފުރުސަތުތަކެއް ލިބިގެންދާނޭކަމަށެވެ.
މިއަދު ޝާއިޢުކުރި އުސޫލުގައި ބުނެފައިވާ ވާގޮތުން ބޭރުގެ ފަރާތްތަކަށް ރާއްޖޭގައި އިންވެސްޓް ކުރެވޭނެ ދާއިރާތަކާއި، އޭގެ ޝަރުތުތަކާއި، އަދި ޖޮއިންޓް ވެންޗަރ އުޞޫލުން އިންވެސްޓް ކުރެވޭނެ ދާއިރާތަކުގެ އިތުރުން، ބޭރުގެ ފަރާތްތަކަށް އިންވެސްޓް ނުކުރެވޭނެ ދާއިރާތައް ކަނޑައަޅާފައި ވެއެވެ.
ދިވެހިންނަށް ހާއްސަކުރެވިފައިވާ ދާއިރާތައް
- ހޯލްސޭލް އަދި ރީޓެއިލް ވިޔަފާރި
- ލޮޖިސްޓިކްސްގެ ޚިދުމަތްތައް
- އާންމު ކަނޑު ދަތުރުފަތުރުގެ ޚިދުމަތްތައް
- ބަންކަރިންގެ ޚިދުމަތުގެ އިތުރުން
- 15 މިލިއަން ޑޮލަރުން ދަށުގެ ކޮންސްޓްރަކްޝަން މަޝްރޫޢުތައް
ރާއްޖެއަށް މުދާ ހިފައިގެން އައިސްއޮތް ބޯޓެއް.. ލޮޖިސްޓިކްސް ދާއިރާ ވަނީ ދިވެހިންނަށް ހާއްސަކޮށްފައި... ފޮޓޯ: ވޮއިސް
މީގެ އިތުރުން އައު އުސޫލްތަކާއެކު ބޭރު ފަރާތްތަކުގެ އެހީތެރިކަމާއި ތަޖުރިބާ ބޭނުންވާ ދާއިރާތަކުގައި ކުރިއެކޭވެސް އެއްގޮތަށް ޖޮއިންޓް ވެންޗަރ އުސޫލުން އިންވެސްޓްކުރުމުގެ ފުރުޞަތު، ބޭރުގެ ފަރާތްތަކާއެކު ދިވެހީންނަށް ފަހިވެގެންދާނޭކަމަށް އިކޮނޮމިކް މިނިސްޓްރީން ވަނީ ފާހަގަކޮށްފައެވެ.
ދިވެހިންގެ ހިއްސާއާއެކު ބޭރުގެ ފަރާތްތަކަށް ކުރެވޭ ވިޔަފާރިތަކުގެ ތެރޭގައި އެންމެ ފާހަގަކޮށްލެވެނީ އޮޑިޓިންގެ ދާއިރާއެވެ. އިކޮނޮމިކް މިނިސްޓްރީގެ އައު އުސޫލުގައިވާގޮތުން ރާއްޖޭގައި ދެން އޮޑިޓިން ފާމެއް ހިންގަން ބޭނުންނަމަ، އެކުންފުނީގައި ދިވެއްސެއްގެ 25 އިންސައްތަ އޮންނަން ޖެހެއެވެ. އޮޑިޓިން ދާއިރާގައި ބޭރުގެ ފަރާތްތަކަށް ހަރަކާތްތެރިވެވޭނޭ އައު އުސޫލެއް ހަމަޖައްސާފައިވާއިރު، މިހާރު އޮޑިޓިންގައި ގިނައިން ހަރަކާތްތެރިވަނީ އަވައްޓެރި ޤައުމުތަކަށް ނިސްބަތްވާ ކުންފުނިތަކެވެ.
އިކޮނޮމިކް މިނިސްޓްރީން ބުނީ އައު އުސޫލްތައް އެކުލަވާލުމުގައި ވަޒީރުންގެ މަޖިލީހުން ގޮތް ނިންމާފައިވަނީ ދައުލަތުގެ އިދާރާތަކާއި، އިންވެސްޓަރުންނާއި އަދި ކަމާބެހޭ ފަރާތްތަކާއެކު މަޝްވަރާ ކުރުމަށްފަހު، ދިވެހިން ކުރިއަރަމުން އަންނަ ދާއިރާތަކުގައި ދިވެހި ވިޔަފާރިތަކަށް ފުރުޞަތު އިތުރުކޮށް ދިނުމަށެވެ. މި ބަދަލުތަކުގެ މައިގަނޑު އަސާސަކީ ދިވެހިން ކުރިއަރަމުން އަންނަ ދާއިރާތައް، ދިވެހިންނަށް ޚާއްސަ ކުރުމާއެކު، ދިވެހީންގެ ކެރިފޯރުންތެރިކަމާއި ކުޅަދާނަކަން ނެތް ދާއިރާތައް ބޭރުގެ ފަރާތްތަކަށް ހުޅުވާލާފައި ބޭއްވުންކަމަށް އޮކޮނޮމިކް މިނިސްޓްރީން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
