ނަފްސާނީ ދުޅަހެޔޮކަމަކީ އިންސާނާ ދިރިއުޅުމުގެ އަސާސީ ހައްޤެއް: ރައީސް
ނަފްސާނީ ދުޅަހެޔޮކަމަކީ އިންސާނާ ދިރިއުޅުމުގެ އަސާސީ ހައްޤެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
މިއަދު ފާހަގަކުރަމުންދާ ދުނިޔޭގެ ނަފްސާނީ ދުޅަހެޔޮކަމުގެ ދުވަހުގެ މުނާސަބާގައި އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ނަފްސާނީ ދުޅަހެޔޮކަމަކީ ދިރިއުޅުމުގައި އިންސާނީ އެންމެ އަސާސީ ހައްޤުގެ ތެރޭގައި ހިމެނިގެންވާ ކަމެކެވެ. ރައީސް ވިދާޅުވީ އެ ހައްޤު ކަށަވަރުކޮށްދިނުމަށް ސަރުކާރުން އަބަދުވެސް މަސައްކަތްކުރަމުންދާނޭ ކަމަށެވެ.
ނަފްސާނީ ދުޅަހެޔޮކަމުގެ މިއަހަރުގެ މި ދުވަހުގެ ޝިއާރުގެ ގޮތުގައި "އިންސާނީ ކާރިސީ ހާލަތްތަކުގައި ނަފްސާނީ ދުޅަހެޔޮކަމުގެ މައްޗަށް" ކަން ފާހަގަކުރައްވަމުން ރައީސްގެ ޕޯސްޓްގައި ވިދާޅުވީ މި ޝިއާރުގައި ދުނިޔޭގެ ފެންވަރުގައި ފިޔަވަޅު އަޅަން ގޮވާލާކަމަށެވެ. ޚާއްޞަގޮތެއްގައި ފަލަސްޠީނުގެ ރައްޔިތުންނަށް، އެމީހުންގެ ނަފްސާނީ ދުޅަހެޔޮކަމަށް ބޭނުންވާ އެހީތެރިކަން ވަރަށް ބޮޑަށް ބޭނުންވެފައިވާކަން ފާހަގަކުރެއްވިއެވެ. އަދި ހުރިހާ ފަރާތްތަކަކުންވެސް އިކަމަށް އިޖާބަދޭންޖެހޭކަމަށް ރައީސް ވިދާޅުވިއެވެ.
ނަފްސާނީ ދުޅަހެޔޮކަމަށް ސަރުކާރުން އިސްކަންދެއްވާކަން ފާހަގަކުރައްވަމުން ރައީސް ވަނީ އެ ދާއިރާ ހަރުދަނާކުރުމަށް ސަރުކާރުން ގިނަ މަސައްކަތްތަކެއް ކުރައްވަމުން އަންނަ ކަމަށެވެ. އެގޮތުން މޫސުމީ، ޞިއްޙީ އަދި އިންސާނީ ކާރިސާ ފަދަ ކަންކަމުގައި ކުރިމަތިވާ ނަފްސާނީ ކަންކަމަށް އެހީތެރިވެވޭނޭހެން ކަންކަން ބައްޓަންކުރަމުންދާކަން ރައީސްގެ ޕޯސްޓްގައި ވަނީ ފާހަގަކުރައްވާފައެވެ.
ކޮންމެ އަހަރެއްގެވެސް އޮކްޓޯބަރުމަހުގެ 10 ވަނަ ދުވަސް ފާހަގަކުރަނީ ދުނިޔޭގެ ނަފްސާނީ ދުޅަހެޔޮކަމުގެ ދުވަހުގެ ގޮތުގައެވެ.
Advertisement
This content is created and paid for by advertisers and does not involve Voice Journalists
