މުޅި ރާއްޖެއިން 210 ޕްރިންސިޕަލުން ބައިވެރިވާ އަހަރީ ޕްރިންސިޕަލުންގެ ކޮންފަރެންސް މިއަދު ފަށައިފިއެވެ.
މާލެ އާއި އަތޮޅުތަކުގެ ސްކޫލުތަކުގެ ޕްރިންސިޕަލުން ބައިވެރިވާ މި ކޮންފަރެންސް ކްރޮސްރޯޑްސްގައި އިފްތިތާހުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒެވެ.
ކޮންފަރެންސްގެ އިފްތިތާހީ ޖަލްސާގައި ވާހަކަފުޅު ދައްކަވަމުން ތައުލީމާ ބެހޭ ވަޒީރު ޑރ. އިސްމާޢީލް ޝަފީޢު ވިދާޅުވީ މި އަހަރުގެ ޕްރިންސިޕަލުންގެ ކޮންފަރެންސް ބޭއްވެނީ މުޅިން ތަފާތު ގޮތަކަށް ކަމަށާއި، އެގޮތުން މިފަހަރުގެ ކޮންފަރެންސް ކުރިއަށްދަނީ މުދައްރިސުންގެ ޕްރޮފެޝަނަލް ޑިވެލޮޕްމަންޓަށް ޚާއްސަ އަހައްމިއްޔަތުކަމެއް ދެވިގެން ކަމަށެވެ.
މި ކޮންފަރެންސްގެ ތެރެއިން ބާއްވާ ސެޝަންތަކުގައި ކްލާސްރޫމް ތެރޭގެ މަސައްކަތާއި، މުޖުތަމަޢުގެ ބައިވެރިވުމާއި، މަންހަޖު ތަންފީޒުކުރުމާއި، ސީދާ ކްލާސްރޫމްގެ ކިޔަވައިދިނުން ފަދަ އެކި ފެންވަރުގެ މަޝްވަރާތައް ހިމެނޭނެ ކަމަށާއި މި މަޝްވަރާތަކުން މުދައްރިސުންގެ ހުށަހެޅުންތައް ކޮންފަރެންސްގެ ތެރެއިން އެއްކުރެވޭނެ ކަމަށް ވަޒީރު ވިދާޅުވިއެވެ.
މި އަހަރުގެ ކޮންފަރެންސްގެ މަޤްޞަދަކީ ޕްރިންސިޕަލުންނާއި މުދައްރިސުންނަށް ތަޖުރިބާ ޙިއްސާކުރުމުގެ ޕްލެޓްފޯމެއް ގާއިމުކޮށް، ގައުމީ ތަޢުލީމީ ސިޔާސަތުތައް ރަނގަޅުކުރުމަށް އެހީތެރިވެދޭނެ ހުށަހެޅުންތައް ހޯދުން ކަމަށް މިނިސްޓަރު ފާހަގަކުރެއްވިއެވެ.
މީގެއިތުރުން، ތަޢުލީމީ ދާއިރާގައި އެއްބާރުލުން ވަރުގަދަކޮށް، ޤާބިލު މުދައްރިސުން އިތުރުކޮށް، ރާއްޖޭގެ ތަޢުލީމީ ނިޒާމަށް އެދެވޭ ބަދަލުތަކެއް ގެނައުމަކީވެސް މި ކޮންފަރެންސްގެ މަޤްޞަދެއް ކަމުގައި މިނިސްޓަރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
