15 އަހަރުގެ ދިގު މުއްދަތަކަށްފަހު ސްކޫލް ދަރިވަރުންނަށް ހާއްސަ ކޭމްޕް ސައިޓެއް މާލެ ކައިރީ މިއަދު ހުޅުވައިފިއެވެ.
ކްރޮސްރޯޑްސް މޯލްޑިވްސްގައި ތަރައްގީކޮށްފައިވާ މި ކޭމްޕް ސައިޓް ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުއެވެ.
މި ސަރަޙައްދަކީ ސްކޫލްތަކުގެ ކެޑޭޓުންނާއި، ސްކައުޓުންނާއި އަދި ގައިޑުންނަށް ކޭމްޕްތަކާއި އައުޓްޑޯ ޕްރޮގްރާމްތައް ބޭއްވުމަށް ޚާއްސަކުރެވިފައިވާ ތަނެކެވެ. މި ކޭމްޕް ސައިޓް ތަރައްގީކުރުމަށް ބޭނުންވާ ބިން ހަމަޖައްސައިދީފައިވަނީ ކްރޮސްރޯޑްސް މޯލްޑިވްސް ހިންގާ ކުންފުނި، ޑްރީމް އައިލެންޑް ޓޫ ލިމިޓެޑްގެ އެހީތެރިކަމާއެކުގައެވެ.
ކޭމްޕިން ސައިޓު ރައީސް ބައްލަވައިލައްވަނީ
އެތަން ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން އެޑިޔުކޭޝަން މިނިސްޓަރ ޑރ. އިސްމާޢީލް ޝަފީޢު ވިދާޅުވީ މި އައު ކޭމްޕް ސައިޓުން ދަރިވަރުންގެ އިތުރު ހަރަކާތްތަކާއި ލީޑަޝިޕް ހުނަރުތައް ވަރުގަދަކުރުމަށް އެހީތެރިވެދޭނެ ކަމަށެވެ.
3 ހެކްޓަރުގެ ސަރަހައްދެއްގައި ތަރައްގީކޮށްފައިވާ މި ކޭމްޕް ސައިޓްގައި އިދާރީ އޮފީހަކާއި، ފަސްޓް އެއިޑް ރޫމަކާއި، ދުވާލުގެ ވަގުތު ހޭދަކުރުމަށް ޚާއްސަ ކުރެވިފައިވާ ކޮޓަރިތަކަކާއި އަދި މިސްކިތެއް ހިމެނެއެވެ.
Advertisement
This content is created and paid for by advertisers and does not involve Voice Journalists
