މިދިޔަ އަހަރާ އަޅާބަލާއިރު އަހަރުގެ މިހާތަނަށް ރާއްޖޭގައި ފޮރިން އިންވެސްޓްމަންޓް ރަޖިސްޓްރީކުރި އަދަދު އިތުރުވެފައިވެއްޖެއެވެ.
ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީގެ ތަފާސްހިސާބަށް ބަލާއިރު، ހުސްވި ސެޕްޓެމްބަރުމަހުގެ ނިޔަލަށް ފޮޮރިން އިންވެސްޓްމަންޓް ރަޖިސްޓްރޭޝަން ފީގެ ގޮތުގައި ދައުލަތަށް ވަނީ 1.3 މިލިއަން ރުފިޔާ ބަލައިގަނެފައެވެ. މިއީ މިދިޔަ އަހަރު ބަލައިގަތް އަދަދަށް ވުރެ 615،700 ރުފިޔާ އިތުރުވުމެކެވެ. މިދިޔަ އަހަރުގެ މިހާތަނަށް މިއަދަދު އުޅެނި 691,400 ރުފިޔާގައެވެ.
ޑޮލަރުން ބަލާނަމަ އަހަރުގެ މިހާތަނަށް ފޮރިން އިންވެސްޓްމަންޓް ފީގެ ގޮތުގައި 75,918 ޑޮލަރު ވަނީ ލިބިފައެވެ. ރާއްޖޭގައި ކުރާ ފޮރިން އިންވެސްޓްމަންޓް އިދާރީ ފީގެ ގޮތުގައި ނަގަނީ 5،000 ޑޮލަރެވެ. އެ ރޭޓުން ބަލާނަމަ އަހަރުގެ މިހާތަނަށް 15 ފޮރިން އިންވެސްޓްމަންޓް ރަޖިސްޓްރީކޮށްފައިވާކަމަށް މީރާގެ ތަފާސްހިސާބުތަކުން ދައްކައެވެ.
ރާއްޖެއަކީ އިންވެސްޓަރުންނަށް ފަހި މާހައުލަކަށް ހެދުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. މިގޮތުން މިހާތަނަށްކުރި އެންމެ މުހިންމު މަސައްކަތްތަކުގެ ތެރޭގައި ޒަމާނަށް ނުފެތޭގޮތަށް މިހާތަނަށް އަމަލުކުރަމުންއައި ފޮރިން އިންވެސްޓްމަންޓާބެހޭ އައު ޤާނޫނު އުވާލައި އައު ޤާނޫނު ތަސްދީގުކޮށްފައިވާކަން ފާހަގަކޮށްލެވެއެވެ.
މީގެ އިތުރުން ރާއްޖެއަށް އެންމެ ފައިދާހުރި ގޮތަށް ރާއްޖޭގައި އިންވެސްޓް ކުރުމުން ރަށްވެހިކަމުގެ ވިސާ ލިބޭ ގޮތަށް "ރެސިޑެންސް ބައި އިންވެސްޓްމަންޓް" ޕްރޮގްރާމެއް ފެށުމަށްވެސް ސަރުކާރުން ވަނީ ނިންމާފައެވެ.
Advertisement
This content is created and paid for by advertisers and does not involve Voice Journalists
