މާލޭގެ އެކި ސަރަހައްދުތަކުގައި 4 ފުރޮޅުލީ އުޅަނދުތައް ޕާކްކުރުމަށް ހާއްސަކުރި ޖާގަތަކުގައި ބަހައްޓާފައިހުންނަ ސައިކަލްތައް ޓޯކުރުމުގެ މަސައްކަތް ފުލުހުން ފަށައިފިއެވެ.

މިކަމާ ގުޅޭގޮތުން ފުލުހުން މިއަދު ބުނެފައިވަނީ ކުރިން ކާރު ޕާކިންޒޯންތަކަށް ހާއްސަކޮށްފައިހުރި ޖާގަތަކުގައި ސައިކަލްތައް ބަހައްޓާނަމަ ސައިކަލްތައް ޓޯކުރާނޭކަމަށެވެ. މާލެ ސިޓީގެ އެކި ސަރަހައްދުތަކުގައި ހަތަރު ފުރޮޅުލީ އުޅަނދު ޕާކްކުރުމަށް ކަނޑައެޅިފައިވާ ޒޯންތަކަކީ އެންމެންނަށް ބޭނުންކުރެވޭ ގޮތަށް ހުންނަ ތަންތަންކަމަށްވުމާއެކު އެއްވެސް ފަރާތަކުން އެތަންތަނުގައި ސައިކަލް ޕާކު ނުކުރުމަށް ފުލުހުން ވަނީ އިލްތިމާސްކޮށްފައެވެ.

މާލޭގެ އެކި ސަރަހައްދުތަކުގައި ޕާކްކުރުމަށް ކުއްޔަށް ދޫކޮށްފައިހުރި ޕާކިން ސްލޮޓްތައް ނަގައި، އެތަންތަން އާންމު ޕާކިންއަށް ދޫކުރުމަށް ޓްރާންސްޕޯޓް މިނިސްޓްރީން މާލެސިޓީ ކައުންސިލަށް އަންގާފައިވަނީ ހުސްވި ސެޕްޓެމްބަރުމަހުގެ ތެރޭގައެވެ. އެކަމާ ގުޅިގެން މާލެ ސިޓީކައުންސިލުން ވަނީ ސެޕްޓެމްބަރުމަހުގެ ނިޔަލަށް މުއްދަތު ހަމަވާ ސްލޮޓްތައް ކުއްޔަށްދޫކޮށްފައިވާ މުއްދަތު އަލުން އިތުރު ނުކުރުމަށް ނިންމާފައެވެ. 

މާލޭގެ އެކި ސަރަހައްދުތަކުގައި ކައުންސިލުން ވެހިކަލްތައް ޕާކްކުރުމަށް ދޫކޮށްފައިވާ ޖާގަތަކުގެ އަދަދު 1000 އަރާއިރު، މިދިޔަ އަހަރު ޓްރާންސްޕޯޓުން ވަނީ އިތުރަށް ސްލޮޓްތައް ކުއްޔަށް ނުދިނުމަށް ސިޓީކައުންސިލަށް އަންގާފައެވެ.

މާލޭގައި ކާރުތައް ޕާކްކުރުމަށް ޕާކިން ސްލޮޓްތައް 1500 ރުފިޔާއަސް ކުއްޔަށް ދޫކުރަމުން އައިސްފައިވާއިރު، ޓެކްސީތައް ބޭއްވުމަށް 700 ރުފިޔާއަށް ޕާކިން ސްލޮޓްތައް ދޫކުރިއެވެ.

މާލެ ސަރަހައްދުގައި އެންމެ ބޮޑު މައްސަލައަކީ އެއްގަމު އުޅަނދުފަހަރު ގިނަވުމުގެ މައްސަލައެވެ. އުޅަނދުތައް ގިނަވެ ޕާކްކުރުމުގެ މައްސަލަ މިހާރު ވަނީ އިންތިހާއަށް ބޮޑުވެފައެވެ. މާލެ ސަރަހައްދުގައި ޕާކްކުރާނޭ ޖާގަ ނުލިބުމުން ގިނަ މީހުން އުޅަނދުތައް މިހާރު ޕާކްކުރަނީ ހުޅުމާލޭގެ އެކި ސަރަހައްދުތަކުގައެވެ.