އެލައިޑް އިންޝުއަރަންސް ކުންފުނީގެ އިސްލާމިކް ވިންޑޯ، އެލައިޑް ތަކާފުލްގެ "ފަޔަރ ތަކާފުލް" ހިދުމަތަށް އޮންލައިނުކޮށް ހުށަހެޅޭގޮތަށް ހަދައިފިއެވެ.

އެލައިޑުން ބުނީ އިސްލާމީ ޝަރީއާއާ އެއްގޮތްވާ ގޮތަށް ނެގޭގޮތަށް ފަރުމާކޮށްފައިވާ މި ހިދުމަތް އެކުންފުނީގެ އޮންލައިޓް ޕޯޓަލް "މައި އެލައިޑް" މެދުވެރިކޮށް މިހާރު ނެގޭނޭ ކަމަށެވެ. މިއާއެކު ފަޔާ ތަކާފުލް ނެގުމަށް ބޭނުންވާ ފަރާތްތަކަށް  ވަގުތުން ޕްލޭން އޮންލައިނުކޮށް އަވަހަށް ފަސޭހައިން އަދި އެއްވެސް ލިޔެކިޔުމެއް ހުށަހެޅުމެއް ހުށަހަޅަން ނުޖެހި ހިދުމަތް ހޯދުމުގެ ފުރުސަތު ފަހިވެގެންދާނެއެވެ.

އެލައިޑުން ބުނީ ކުދި އަދި މެދުފަންތީގެ ވިޔަފާރިތަކަށް ހާއްސަކޮށްގެން ފަރުމާކޮށްފައިވާ ފަޔަރ ތަކާފުލް ހިދުމަތުން އަލިފާނުގެ  ހާދިސާއިން ލިބޭ ގެއްލުންތަކުންނާއި ގުދުރަތީ ކާރިސާތަކުން މުދަލަށްލިބޭ ގެއްލުމާއި އެނޫންވެސް ސަބަބުތަކާ ހެދި ލިބިދާނޭ މާލީ ގެއްލުމުން ރައްކާތެރިކަން ފޯރުކޮށްދެއެވެ. އަދި މިފަދަ ނުރައްކާތަކުގެ ތެރޭގައި، ހަމަނުޖެހުންތަކާއި، މުޒާހަރާތަކުން މުދަލަށްލިބޭ ގެއްލުން، ފެންޓޭންކް، ނުވަތަ ފެން ހޮޅިއެއް ފަލައިގެންދިއުން ނުވަތަ ވައްކަމުގެ ހާދިސާއިން ލިބޭ ގެއްލުންތައް ހިމެނެއެވެ.

ބޭކަރީތަކާއި ރެސްޓޯރެންޓްތަކާއި ޖިމްތަކާއި، ސެލޫންތަކާއި، ވޯކްޝޮޕްތަކާއި، ، ގުދަންތަކާއި، ޑައިވް ސެންޓަރުތަކާއި އަދި އެނޫންވެސް ކުދި ވިޔަފާރިތަކަށް މިހާރު ހެޔޮއަގުގައި މި ޕްލޭނުން ރައްކާތެރިކަން ލިބިގެންދާނޭކަމަށް އެލައިޑުން ބުނެއެވެ. އެލައިޑުން މި ޕްލޭން ފަރުމާކޮށްފައިވަނީ އެޕްލައިކުރާ ވިޔަފާރިއަކަށް ހާއްސަކޮށް ކަސްޓަމައިޒް ކުރެވޭނެ ގޮތަކަށެވެ.

އެލައިޑް ތަކާފުލްގެ އަމާޒަކީ ރާއްޖޭގެ އެކި ކަންކޮޅުތަކުގައިވާ ވިޔަފާރިތަކަށް މާލީ ރައްކާތެރިކަން ހޯދައިދިނުން ކުރިއަށްވުރެ ފަސޭހަކޮށްދީ އަވަހަށް ހިދުމަތް ފޯރުކޮށްދިނުމުގެ އިތުރުން އަތްފޯރާފަށަށް ހިދުމަތް ގެނެސްދިނުން ކަމަށް އެލައިޑުން ބުނެއެވެ.