ރާއްޖެއިން އިނގިރޭސިވިލާތާއެކު މިނިވަން ވިޔަފާރީގެ އެއްބަސްވުމެއްގެ މަޝްވަރާތައް ފެށީ މިދިޔަ ސަރުކާރުގައި ނޫން ކަމަށާއި، އެ މަޝްވަރާތައް ފަށައިފައިވަނީ 2016 ވަނަ އަހަރު ކަމަށް އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުހައްމަދު ސަޢީދު ވިދާޅުވެއްޖެއެވެ.

ވަޒީރު އެހެން ވިދާޅުވީ މިއަދުގެ މަޖިލީހުގެ ޖަލްސާގައި ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ކުރެއްވި ސުވާލުތަކަށް ޖަވާބު ދެއްވަމުންނެވެ. 

އެގޮތުން އިނގިރޭސިވިލާތާއި ރާއްޖެއާ ދެމުދު މިއަހަރު މިނިވަން ވިޔަފާރީގެ އެއްބަސްވުމަކަށް ޢަމަލުކުރަން ނިންމާފައިވާއިރު އެ މަސައްކަތް އޮތީ ކޮން މަރުހަލާއެއްގައިތޯ މެންބަރު ވަނީ ސުވާލު އުފައްދަވާފައެވެ.

އެ ސުވާލަށް ޖަވާބު ދެއްވަމުން އެކަން ދޮގު ކުރައްވައި ވަޒީރު ވިދާޅުވީ، ހިރާއްޖެއާއި އިނގިރޭސިވިލާތާއި ދެމެދު މިނިވަން ވިޔަފާރީގެ އެއްބަސްވުމަކަށް ޢަމަލުކުރަން ފަށާނެ ކަމުގެ ޔަޤީންކަމެއް އިނގިރޭސި ސަރުކާރުން ދިން ކަމުގެ މަޢުލޫމާތު މިނިސްޓްރީއަށް ލިބިފައިވާ އެއްވެސް ލިޔެކިއުމެއްގައި ނެތް ކަމަށެވެ. އެހެންކަމުން މެންބަރުގެ އެ ވާހަކައިގެ އަސާސް ހިއްސާކޮށްދެއްވުމަށް ވަޒީރު ވަނީ އެދިވަޑައިގަންނަވައިފައެވެ.

ވަޒީރު ވަނީ ރާއްޖެއާއި އިނގިރޭސިވިލާތާއި ދެމެދު މިނިވަން ވިޔަފާރީގެ އެއްބަސްވުމުގެ ވާހަކަތައް ފަށާފައިވަނީ 2016 ވަނަ އަހަރު ކަމަށް ވިދާޅުވެފައެވެ. 

އެގޮތުން ޔޫރަޕިއަން ކޮމިޝަން (އީޔޫ)އިން އިނގިރޭސިވިލާތް ވަކިވުމާއެކު އެ މަޝްވަރާތައް ފެށިއިރު، އެކަމާއި ގުޅޭ އެންމެ ފުރަތަމަ ސިޓީއެއް ފޮނުވާފައިވަނީ 16 އޮކްޓޯބަރު 2016ގައި ކަމަށް ވަޒީރު ވިދާޅުވިއެވެ. 

އެހެންކަމުން މިދިޔަ ސަރުކާރުގައި އިނގިރޭސިވިލާތާއި އެކު ކުރެވުނު މަޝްވަރާތަކުގެ ތެރެއިން މަހުގެ ޓެރިފް ކުޑަކުރަން ނިންމި ނަމަވެސް އެކަމަކީ ސަރުކާރު ބަދަލުވުމާއި ގުޅިފައިވާ ކަމެއް ނޫން ކަމަށް ވަޒީރު ވަނީ ވިދާޅުވެފައެވެ.

ފާހަގަކުރެވޭ ގޮތުގައި ރާއްޖެއަކީ ދެމެހެއްޓެނެވި ގޮތެއްގައި މަސްވެރިކަން ކުރާ ޤައުމަކަށްވީ ނަމަވެސް ރާއްޖެއިން އިނގިރޭސިވިލާތަށް އެކްސްޕޯޓްކުރާ ކަނޑުމަހަށް 20% އިމްޕޯޓް ޓެރިފް ނަގައެވެ. މި ޓެރިފްގެ ސަބަބުން އެ ޤައުމުގެ ބާޒާރުގައި ދިވެހި މަހުގެ އަގު ބޮޑުވާއިރު ވަކިން ޚާއްސަކޮށް އިނގިރޭސިވިލާތާއެކީ މިނިވަން ވިޔަފާރީގެ އެއްބަސްވުންތަކުގެ ދަށުން އިސްތިސްނާ ލިބިފައިވާ ޤައުމުތަކުގެ އުފެއްދުންތަކާއި އަޅާބަލާއިރު އެ ފަރަގު ފެންނަނީ ވަރަށް ބޮޑުކޮށެވެ.

އެ މައްސަލަ ޙައްލުކޮށް، ޓެރިފްގެ ރޭޓު ކުޑަކުުރުމަށް މި ސަރުކާރާއެކު ފާއިތުވި ދެ ސަރުކާރުތަކުގައި ވެސް ގިނަ މަޝްވަރާތަކެއް ވަނީ ކޮށްފައެވެ.