ބޭންކިން ލައިސެންސުތައް މިދިޔަ އަހަރުގެ އޮކްޓޯބަރު މަހުގެ ތެރޭގައި ދިން ޑިވެލޮޕްމެންޓް ބޭންކް އޮފް މޯލްޑިވްސް (ޑީބީއެމް) ވަރަށް އަވަހަށް ހިންގަން ފަށާނެ ކަމަށް އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުހައްމަދު ސަޢީދު ވިދާޅުވެއްޖެއެވެ.

މިއަދު މަޖިލީހުގައި ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ކުރެއްވި ސުވާލުތަކަށް ޖަވާބުދެއްވަމުން ވަޒީރު ވިދާޅުވީ، އެ ބޭންކުގެ މަސައްކަތްތައް އަންދާޒާ ކުރިގޮތަށް ވަރަށް ބާރު ސްޕީޑެއްގައި ކުރިއަށްދާ ކަމަށާއި، އެ ބޭންކު ވަަރަށް އަވަހަށް އޮޕަރޭޝަނަލައިޒްވާނެ ކަމަށެވެ.

އެހެން ނަމަވެސް އެ ބޭންކު ހުޅުވާނެ ވަކި ތާރީޚެއް ވަޒީރު ވިދާޅުވެފައިނުވެއެވެ.

މިދިޔަ އަހަރުގެ މޭއި މަހުގެ ތެރޭގައި ރައީސް ޑރ. މުޙައްމަދު މުޢިއްޒުގެ ޚާއްސަ ޤަރާރަކުން އުފެއްދި ޑީބީއެމްއަކީ އިގުތިސާދީ އަދި ތަރައްގީގެ މަޝްރޫއުތަކަށް ދިގު މުއްދަތުން އަނބުރާ ދަައްކާ ގޮތަށް ފައިސާ އާއި އެހީތެރިކަން ފޯރުކޮށްދިނުމަށް އުފެއްދި ބޭންކެކެވެ. 

އެ ބޭންކުގެ ގަވާއިދުތައް އެކުލަވާލުމަށް މޯލްޑިވްސް އިންޓަނޭޝަނަލް ފައިނޭންޝަލް ސާވިސް އޮތޯރިޓީ (މިފްޒާ)ގެ ނަމުގައި އިދާރާއެއް މިދިޔަ އަހަރުގެ ޖެނުއަރީ މަހު ސަރުކާރުން އުފައްދައިފައިވާއިރު، އެ ބޭންކުވަނީ މިދިޔަ އަހަރުގެ ނޮވެމްބަރު މަހުގެ 16 ވަނަ ދުވަހު ހުޅުވާފައެވެ.

ޑީބީއެމް ހުޅުވުމުގެ ރަސްމިއްޔާތަށް ފަހު ރައީސް މުޢިއްޒު އަދި ޑީބީއެމްގެ ސީއީއޯ އަދި އޭރުގެ ކުންފުނީގެ ރަޖިސްޓްރާ އެ ބޭންކު ބައްލަވައިލައްވަނީ -- ފޮޓޯ: ރައީސް އޮފީސް

އެ ބޭންކަށް ބޭނުންވާ ހިންގުމުގެ ލައިސެންސުތައް އެމްއެމްއޭއިން ދީފައިވަނީ މިދިޔަ އަހަރުގެ އޮކްޓޯބަރު މަހުގެ 13 ވަނަ ދުވަހުއެވެ. އެމްއެމްއޭއިން އެ ލައިސެންސުތައް ދިންއިރު ވެސް، މި އަހަރުގެ އޮކްޓޯބަރު މަހުގެ 12ގެ ކުރިން އެ ބޭންކުގެ އޮޕަރޭޝަން ފަށަން ޝަރުތުކޮށްފައިވެއެވެ.

އެ ބޭންކުގެ އޮޕަރޭޝަން ނުފެށި ނަމަވެސް، އެ ބޭންކުގެ ޗެއާޕާސަންކަަމަށް މާލީ ދާއިރާގެ 25 އަހަރުގެ ތަޖުރިބާ ހުންނެވި ސިންގަޕޫރުގެ ރައްޔިތެއް ކަމަށްވާ އަރުނީ ގުނެތިލަކަ ވަނީ އައްޔަނުކުރައްވާފައެވެ. އަދި ބޭންކްގެ ސީއީއޯކަމަށް އިނގިރޭސިވިލާތުގެ ރައްޔިތެއް ކަމަށްވާ ނޮއެލް ގްރެގާ ޕެޓަސަން ޖޯންސް އައްޔަނުކުރެއްވިއިރު، މާ ގިނަ ދުވަހެއް ނުވެ ސީއީއޯ ވަނީ އެ މަގާމުން އިސްތިއުފާ ދެއްވާފައެވެ.

އަދި އެ ބޭންކުގެ އޮފީސް ހެދުމަށް 4 މިލިއަނެއްހާ ރުފިޔާ ޚަރަދުކުރި ކަމަށް ވެސް އެ ވުޒާރާގެ ހިސާބުތަކުން ދައްކައެވެ.