ހަމާސްގެ ޖަލުގައި ހުރި ދެއަހަރުދުވަހުގެ ތެރޭގައި އެންމެ ހިތްދަތި ތަޖުރިބާތަކެއް ކުރަންޖެހުނީ އިސްރާއީލް ސިފައިން ޣައްޒާ ހިސޯރު ކުރިފަހުންކަމަށް ޔަހޫދީ އަސީރަކު ބުނެފިއެވެ.
ހަމާސްއިން ރަހީނުކުރި އިސްރާއީލަށް ނިސްބަތްވާ 20 އަހަރުގެ ނިމްރޯދް ކޯހެން ދެ އަހަރު އެ ޖަމާއަތުގެ ހައްޔަރުގައި ބެހެއްޓުމަށްފަހު މިދިޔަ އާދިއްތަ ދުވަހު އޭނާ ވަނީ ދޫކޮށްލާފައެވެ. ނިމްރޯދާ ގުޅޭގޮތުން އޭނާގެ ބައްޕަ ޔެހޫދާ, ވަނީ އަލްޖަޒީރާ އާ ވާހަކަދައްކާފައެވެ. ޔެހޫދާ ބުނީ ދެ އަހަރަށްފަހު އޭނާގެ ދަރިފުޅު ފެނުމަށްފަހު އެންމެބޮޑަށް ފާހަގަކުރެވުނު ކަމަކީ، ކުރިން ހީކުރިގޮތާ ހިލާފަށް އޭނާއަށް އެއްވެސް ބަދަލެއް އައިސްފައި ނުވާކަމެވެ. އެގޮތުން ނިމްރޯދުގެ އުޅުމާއި އޭނާގެ މިޖާޒު ހުރީ އޭނާ ހަމާސްގެ ބެލުމުގެ ދަށަށް ގެންދިޔައިރުވެސް ހުރިގޮތަށްކަަށް ބުންޏެވެ.
ހަމާސްގެ ހައްޔަރުގައި ހުރި ދުވަސްތަކާ ބެހޭގޮތުން ވާހަކަދައްކަމުން ނިމްރޯދުގެ ބައްޕަ ބުނީ، އޭނާގެ ހަމައެަނި ޝަކުވާއަކަށް ވީ އިސްރާއީލް ސިފައިން ޣައްޒާ ބަންދުކުރުމާއެކު ތަޖުރިބާކުރަން ޖެހުނު ކަންކަމެވެ. އެގޮތުން ކާނާ އާއި އެނޫންވެސް ކަންކަމަށް ދަތިވިކަން އޭނާ ވަނީ ފާހަގަކޮށްފައެވެ.
ޣައްޒާގައި އިސްރާއީލް ސިފައިން ހިންގަމުންގެންދިޔަ ޖަރީމާތައް ހައްދުފަހަނަ އަޅައި އެންމެފަހުން އެ ސިޓީއަށް އެއްވެސް ބާވަތެއްގެ އެއްޗެއް ސަޕްލައި ނުކުރެވޭނޭހެން ބަންދުކުރިއިރު، އެހީދޭ ފަރާތްތަކަށް ވަނުންވެސް މަނާކުރިއެވެ. އެކަމުގެ ސަބަބުން ޣަްޒާގައި ތިބި ރައްޔިތުންގެ އިންސާނީ ހައްގުތައް ގެއްލިގެން ގޮސްފައިވާަކަމަށް ބައިނަލްއަޤްވާމީ އިދާރާތަކުން ވަނީ ތަކުރާރުކޮށް ފާހަގަކޮށްފައެވެ.
ހަމާސްއިން ދޫކުރި އިސްރާއީލަށް ނިސްބަތްވާ އަސީރު ދޫކުރިއިރު ހެޔޮހާލުގައި ތިބިނަމަވެސް އިސްރާއީލް ސިފައިންގެ ބެލުމުގެ ދަށުގައި ތިބި ފަލަސްތީނުގެ ރައްޔިތުންނަށް ވަނީ ޖިސްމާނީ އަދި ނަފްސާނީގޮތުން ބޮޑެތި އަނިޔާތަކެއް ދީފައެވެ. އެގޮތުން ފަލަސްތީނުގެ ބައެއް އަސީރުން މިނިވަން ކޮށްފައިވަނީ ބޮޑެތި ޝަރުތުތަކާ އެކުގައިކަން ފާހަގަކޮށްލެވެއެވެ. އޭގެ ތެރޭގައި ބައެއް އަސީރުން ފަލަސްތީނުން ބޭރަށް އަރުވާލައި، ދުވަހަކުވެސް ފަލަސްތީނަށް ނާދެވޭނޭހެން ވަނީ ޝަރުތުތައް ކޮށްފައެވެ.
Advertisement
This content is created and paid for by advertisers and does not involve Voice Journalists
