ދާއިމީ ބަލިތަކަށް ފަރުވާކުރާ ފަރާތްތަކަށް އުމުރުން 65 އަހަރު ފުރުމުގެ ކުރިން ޕެންޝަން ފައިސާ ލިބޭނެ މަގު ފަހިކުރުމަށް ޕެންޝަނާ ބެހޭ ގާނޫނަށް ހުށަހެޅި އިސްލާޙު މަޖިލީހުން ބޭރުކޮށްފިއެވެ.

އިދިކޮޅު އެމްޑީޕީއަށް ނިސްބަތްވެވަޑައިގަންނަވާ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ހުށަހެޅުއްވި އިސްލާޙުގެ ބޭނުމަކީ އެފަދަ ހާލަތްތަކުގައިވާ ފަރާތްތަކަށް އަވަހަށް މާލީ އެހީތެރިކަން ފޯރުކޮށްދީ، ދިރިއުޅުމުގެ ބުރަ ކުޑަކޮށް، އެ ފައިސާ ހޯދުމުގެ އިޖުރާއަތުތައް ފަސޭހަކުރުމަށް ބަދަލުތަކެއް ގެނައުން ކަމަށް ބިލާ ގުޅޭގޮތުން ވާހަކަދައްކަވަމުން އޭނާ ވަނީ ވިދާޅުވެފައެވެ.

އެ އިސްލާހު މަޖިލީހުން ބަލައިގަތުމާއިމެދު ވޯޓުގައި ބައިވެރިވެވަޑައިގެންނެވި 57 މެންބަރުންގެ ތެރެއިން 52 މެންބަރުން ވޯޓު ދެއްވީ އެ ބިލު ބަލައިނުގަތުމަށެވެ. އެ ބިލު ބަލައިގަތުމާއި އެއްކޮޅަށް ވޯޓު ދެއްވީ އެންމެ ފަސް މެންބަރުންނެވެ. 

މެންބަރު ކުޑޫ ހުށަހެޅުއްވި އިސްލާޙުގައިވާ ގޮތުން ޓާމިނަލް އިލްނެސް" ތަހައްމަލު ކުރަންޖެހޭ މީހެއް ކަމަށް ކަށަވަރު ކޮށްދޭ މެޑިކަލް ސެޓްފިކެޓެއް ހުށަހަޅައިފިނަމަ، އެ މީހެއްގެ އުމުރާއި މަސައްކަތްކުރި އަހަރުތަކަށް ބެލުމެއް ނެތި ޕެންޝަނުގެ ފައިދާ ވީހާ ވެސް އަވަހަށް ލިބޭނެ ގޮތް ހެދުމަށް ވަނީ ހިމަނާފައެވެ.

ބިލު ހުށަހަޅުއްވަމުން ކުޑޫ ވިދާޅުވި ގޮތުގައި، މިހާރު އަމަލުކުރަމުން އަންނަ ޕެންޝަނާ ބެހޭ ގާނޫނުގައި ދާއިމީ ބަލި ތަހައްމަލުކުރާ މީހުންނާ ގުޅޭ ގޮތުން ސާފުކޮށް ބަޔާންކޮށްފައިވާ މާއްދާތަކެއް ހިމެނިފައެއް ނުވެއެވެ. އަދި "މެޑިކަލް ޕްރޮގްނޯސިސް" އަށް ބިނާކޮށް ޕެންޝަން އަވަހަށް ލިބޭނެ އެއްވެސް ނިޒާމެއް މިހާރަކު ނެތެވެ. 

އެހެންކަމުން އެ ބިލާއެކު އެފަދަ ބަލިމީހުންގެ ހާލަތު ވަޒަންކުރުމަށް ޕެންޝަން އޮފީހުން މެޑިކަލް ސްޕެޝަލިސްޓުންގެ ޓީމެއް އެކުލަވާލުމާއެކު، އެ ފައިސާ ހޯދަން ހުށަހަޅާ ތާރީހުން ފެށިގެން 30 ދުވަހުގެ ތެރޭގައި ފައިސާ ދޫކުރަން ޖެހޭނެ ގޮތަށް ލާޒިމުކުރަން އިސްލާހުގައި ހިމަނައިފައިވެއެވެ.