އެމްޑީޕީ ސަރުކާރުން ބ.ކެންދޫ މިސްކިތް އިމާރާތްކުރަން ހަވާލުކުރީ މިސްކިތް އެޅުމުގެ އަދިު އިމާރާތްކުރުމުގެ އެއްވެސް ތަޖުރިބާއެއްނެތް ކުންފުންޏަކާކަމަށް އިސްލާމިކް މިނިސްޓަރު ޑރ.މުހައްމަދު އަލީ ޝަހީމް ވިދާޅުވެއްޖެއެވެ. ރައްޔިތުން މަޖިލީހުގައި މިއަދު ބ.ކެންދޫ  ދާއިރާގެ މެންބަރު މައުރޫފު ޒާކިރު ކުރެއްވި ސުވާލަކަށް ޖަވާބުދެއްވަމުން ޝަހީމް ވިދާޅުވީ، ކުރީ ސަރުކާރުން ކެންދޫ މިސްކިތް އެޅުމަށް ބަޔަކާ ހަވާލުކޮށްފައިވަނީ އިންތިހާބަށް ބޯމަތިވެފައިވަނިކޮށްކަމަށެވެ.

މިނިސްޓަރު ޝަހީމް ވިދާޅުވީ ރައީސް ޑރ.މުހައްމަދު މުއިއްޒު އިންތިހާބު ކާމިޔާބުކުރައްވައި ވެރިކަމުގެ ހުވާކުރެއްވުމުގެ ދޮޅުހަފްތާއެއްހާ ދުވަހުގެ ކުރިން އެކުންފުންޏަށް 2.3 މިލިއަން ރުފިޔާ ދޫކޮށްފައިވާކަމަށެވެ. އެއީ 2023 ވަނަ އަހަރުގެ ނޮވެމްބަރުމަހުގެ 28 ވަނަ ދުވަހެވެ.

ކެންދޫ މިސްކިތް އިމާރާތްކުރި ކުންފުނިން އެ މަސައްކަތްކުރުމުގައި އަމަލުކޮށްފައިވަނީ ވަރަށް ފަރުވާކުޑަކޮށްކަން ފާހަގަކުރައްވަމުން ވަޒީރު ވިދާޅުވީ އެކުންފުނިން މަސައްކަތް ކުރަމުން އައިސްފައިވަނީ އިންޖިނިއަރެއް ނެތިކަމަށެވެ. އެކަމުގެ ސަބަބުން ކުރެހުމާ ހިލާފަށް ކަންކަން ކުރިއަށްގޮސްފައިވާކަމަށާއި އެކަމުގެ ސަބަބުން މަސައްކަތް ކުރިއަށް ގެންދިއުމުގައި ދަތިތަކާ ކުރިމަތިވެފައިވާކަން މިނިސްޓަރު ވިދާޅުވިއެވެ. ކެންދޫ މިސްކިތުގެ މައްސަލާގައި މިނިސްޓްރީގެ ކަންބޮޑުވުން އެކި ގޮތްގޮތުން އެކުންފުންޏަށް އެންގިނަމަވެސް މިހާތަނަށް ހައްލެއް ލިބިފައި ނުވާކަމަށްވެސް މިނިސްޓަރު ވަނީ ފާހަގަކުރައްވާފައެވެ.

މިނިސްޓަރު ޝަހީމް ވިދާޅުވީ ކެންދޫ މިސްކިތުގެ މައްސަލަ ގޮސްފައި އޮތީ ސަރުކާރުން ވަރަށް ކަންބޮޑުވާ ހިސާބަކަށް ކަމަށާއި، އެ މަޝްރޫޢުއަށް ހާއްސަ އިސްކަމެއް ދެއްވައިގެން ދިމާވެފައިވާ މައްސަލަތައް ހައްލުކުރެއްވުމަށް ރައީސްވެސް އެދިވަޑައިގަންނަވާފައިވާކަމަށެވެ.

ކެންދޫގައި އިމާރާތްކުރަނީ 500 މީހުންގެ ޖާގައިގެ މިސްކިތެކެވެ. އެ މިސްކިތް އިމާރާތްކުރުމަށް ހަވާލުކޮށްފައިވަނީ  ފާސްޓްލައިން ޕްރައިވެޓް ނަމަކަށް ކިޔާ ކުންފުންޏަކާއެވެ.