އިސްލާމިކް މިނިސްޓަރު ޑރ. މުހައްމަދު ޝަހީމް އާއި މަޖިލިސް މެންބަރުންނާ ދެމެދު ހިނގި ހޫނު ބަހުސަކާ ގުޅިގެން، މިހާރު ކުރިޔަށްދާ ރައްޔިތުންގެ މަޖިލީހުގެ ޖަލްސާއިން ކެންދޫ ދާއިރާގެ މެންބަރު މައުރޫފް ޒާކިރުގެ ނަން އިއްވައި ތަޅުމުން ނެރެން ނެރެފިއެވެ.

މަޖިލީހުގެ ޖަލްސާގައި ހިތަދޫ ދެކުނު ދާއިރާގެ މެންބަރު އަދި އެމްޑީޕީގެ ޕާލިމެންޓްރީ ގްރޫޕުގެ ލީޑަރު އިބްރާހީމް ނާޒިލް ކުރެއްވި ސުވާލަކާ ގުޅިގެން، ވަޒީރު ޝަހީމް ދެއްވި ޖަވާބުތަކުގައި ކުރީގެ ސަރުކާރުގެ ދަރަނިތަކާ ބެހޭ ގޮތުން ދެއްކެވި ވާހަކަތަކުން މަޖިލިސް ހޫނުވިއެވެ.

އެގޮތުން ވަޒީރު ޝަހީމް ވިދާޅުވެފައިވަނީ، އިސްލާމިކް މިނިސްޓްރީއާ ހަވާލުވެވަޑައިގެންނެވި އިރު އެ ވުޒާރާގައި އެކަނި ވެސް 50 މިލިއަން ރުފިޔާގެ ދަރަނި ނުދައްކާ އޮތް ކަމަށާއި، އެ ދަރަނި މިހާރުގެ ސަރުކާރުން ދައްކަމުންދާކަމަށެވެ. މި ވާހަކަތަކާ ގުޅިގެން އެމްޑީޕީގެ މެންބަރުން އަޑުގަދަކުރައްވަން ފެށުމުން، ވަޒީރު ޝަހީމް ވެސް ވަނީ ކޯފާވެވަޑައިގެން ވާހަކަފުޅު ދައްކަވަން ފައްޓަވައިފައެވެ.

މި ހަމަނުޖެހުމުގެ ތެރޭގައި މެންބަރު ނާޒިލް، ވަޒީރު އިންނެވި މޭޒާ ދިމާއަށް ވަޑައިގަތުމުން، އެހެން މެންބަރުން އޭނާ ހުއްޓުވުމަށް މަސައްކަތްކުރެއްވިއެވެ. އަދި މަޖިލީހުގެ ސެކިއުރިޓީން ވެސް ވަނީ އިތުރު މެންބަރުން ވަޒީރާ ދިމާއަށް ދިއުން ހުއްޓުވުމަށް މަސައްކަތްކޮށްފައެވެ.

އެވަގުތު ރިޔާސަތުގެ ކުރިމައްޗަށް ވަޑައިގެން މައުރޫފް ޒާކިރު އަޑުގަދަކުރައްވަމުން ގެންދެވުމުން، ރިޔާސަތުން އެތައް ފަހަރަކު އިށީނދެވަޑައިގަތުމަށް އެންގެވި ނަމަވެސް، އެ އެންގެވުމަށް ތަބާނުވުމުގެ ސަބަބުން އޭނާގެ ނަން އިއްވައި ތަޅުމުން ވަނީ ނެރެފައެވެ.