ބަންގީގެ އަޑު މަޑުކުރަނީ ކައުންސިލުން، ސައުންޑާ ނުކުޅެން އެންގިން: ޝަހީމް
މާލެ ސަރަހައްދުގެ މިސްކިތްތަކުގެ ސައުންޑާއި ގުޅޭ ކަންކަމުގެ "ތަޅުދަނޑި" އޮންނަނީ މާލެ ސިޓީ ކައުންސިލަށް ކަމަށާ މިސްކިތްތަކުން ބަންގީގެ އަޑު މަޑުވަނީ ކައުންސިލުން ސިސްޓަމްތަކާއި ކުޅޭތީ ކަމުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މިނިސްޓަރު ޝަހީމް މިއަދު ވަނީ މަޖިލީހަށް ހާޒިރުކުރައްވާފަ އެވެ. އެއީ ދެ މެންބަރަކު ހުށައެޅުއްވި ސުވާލުތަކަކާއި ގުޅިގެންނެވެ. އެ ސުވާލުތަކަށް ފަހު އިތުރު ސުވާލަށް ފުރުސަތު ހުޅުވާލުމުން އެމްޑީޕީގެ ހުޅުމާލެ ދެކުނު ދާއިރާގެ މެންބަރު ޑރ. އަހްމަދު ޝަމްހީދު ވަނީ ހުޅުމާލޭގެ ބައެއް މިސްކިތްތަކުން ބަންގީގެ އަޑު އިވޭ މިންވަރު ވަރަށް މަޑު ކަން ފާހަގަ ކުރައްވާ އެކަމާއި ގުޅޭ ސުވާލެއް ކުރައްވާފަ އެވެ.
އެ ސުވާލާއި ގުޅިގެން މިނިސްޓަރު ވިދާޅުވީ މާލެ ސަރަހައްދުގެ މިސްކިތްތަކުގެ ސައުންޑާއި ގުޅޭ ކަންކަމުގެ "ތަޅުދަނޑި" އޮންނަނީ މާލެ ސިޓީ ކައުންސިލަށް ކަމަށެވެ. އަދި ބަންގީގެ އަޑު މަޑުވަނީ ކައުންސިލުން ސިސްޓަމްތަކާއި ކުޅޭތީ ކަމުގައި ވިދާޅުވި އެވެ.
"ސިޓީ ކައުންސިލަށް ތަކުރާރުކޮށް އަޅުގަނޑުމެން އެދެމުން މިދަނީ ސައުންޑް ސިސްޓަމްތަކާއި ނުކުޅޭށޭ ތި ބޭފުޅުން,"
މިނިސްޓަރު ވިދާޅުވީ ވީހާވެސް ދުރަށް ބަންގީގެ އަޑު ފޮނުވުމަށާއި 25 ވަނަ ބުރިއާ ހަމައަށް ބަންގީގެ އަޑު އިވޭނެ ގޮތް ހަދަން އަންގާފައިވާނެ ކަމަށެވެ.
އަދި އެކަމަށް މަސައްކަތް ކުރައްވަމުން ގެންދަވާ ކަމަށް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
