ޣައްޒާ ހަނގުރާމަ ހުއްޓާލުމަށް އެއްބަސްވިފަހުން ފަލަސްތީނުގެ ދަނޑުބިންތަކަށް އިސްރާއީލުން ގެއްލުންދޭ ވަރު ކުރިއަށްވުރެ އިތުރުވެއްޖެއެވެ.

އަލް ޖަޒީރާއިން ބުނެފައިވަނީ މިފަހަކަށް އައިސް ފަލަސްތީނުގެ ދަނޑުބިންތަކަށް އިސްރާއީލުން ގެއްލުންތައްދޭ މިންވަރު ވަރަށްބޮޑަށް އިތުރުވެފައިވާކަމަށެވެ. އެގޮތުން މިފަހަކުން މީޑިއާތަކުގައި ވަނީ ޒައިތޫނި ހޮަވަން ހުރި ދެބައި އުމުރުގެ އަންހެނަކަށް އިސްރާއީލްގެ ކަނާތުފިޔައިގެ ހަރުކަށި ވިސްނުމުގެ ޒުވާނަކު ހަމަލާދޭ ވީޑިއޯއެއް އާއްމުވެފައެވެ. 

އަލްޖަޒީރާއިން ބުނީ އިސްރާއީލްގެ ހަރުކަށި ޔަހޫދީ ގްރޫޕްތަކުން ފަލަސްތީނު މީހުންގެ އޮލިވް ދަނޑުތަކުގައި ހުންނަ ގަސްތައް ކޮންމެ ދުވަހަކުހެން ކަނޑަމުންދާކަމަށެވެ. އިސްރާއީލްގެ ޒުވާނުން މިކަންކުރަނީ އެމީހުންގެ ސިފައިންގެ ވަރަށްބޮޑު އެއްބާރުލުމާއެކުގައިކަންވެސް އެނޫހުން ބުންޏެވެ. 

އޭއެފްޕީއާ ވާހަކަދައްކަމުން ފަލަސްތީނުގެ ދަނޑުވެރިއެއްކަމަށްވާ އަބްދުލް ލަތީފް ބުނީ އޭނާގެ އެއް ހެކްޓަރު ދަނޑުގައި ހުރި ޒައިތޫނިގަސްތައް ކަނޑައި ބިމާހަމަކޮށްލާފައިވާކަމަށެވެ. މި ފަހަކަށް އައިސް މި އަމަލުތައް ހިންގަނީ މޫނު ނިވާކޮށްގެންތިބި އިސްރާއީލުގެ ހަރުކަށި ފިކުރުގެ ޒުވާނުންކަން އޭނާ ވަނީ ފާހަގަކޮށްފައެވެ. "އެމީހުންގެ ބޭނުމަކީ އަހަރުމެން މިތަނުން ދާނެ ގޮތެއްވޭތޯ މަސައްކަތްކުރުން. ކުރިއަށް އޮތްތަނުގައި އެމީހުންގެ ދުއްތުރާ ބޮޑުވާނެ" ލަތީފު ބުންޏެވެ. 

ފަލަސްތީނު މީހެއްގެ ޒައިތޫނި ގަހެއް ކަނދާލާފައި.. ފޮޓޯ: އޭއެފްޕީ

އިސްރާއީލުން ދަނީ ފަލަސްތީނުގެ ވެސްޓްބޭންކް ސަރަހައްދުގެ ޒައިތޫނިގަސްތައް އެންމެ ރަނގަޅަސް ހެދޭ ސަރަހައްދުގައި ޔަހޫދީ އާބާދީތައް އިތުރުކުރުމަށް މަސައްކަތްކުރަމުންނެވެ.

ފަލަސްތީނުގެ އޮލިވް ދަނޑުތަކަކީ އެމީހުންގެ ދިރިއުޅުމުގެ އެންމެ މުހިންމު އެއް ބައެވެ. ފަލަސްތީނު ރައްތިތުންގެ ތެރެއިން 80،000 އާއި 100،000 މީހުންނަކީ އޮލިވްދަނޑުތަކުން ލިބޭ ނަފާއިން ދިރިއުޅުން ކުރިއަށްގެންދާ މީހުންނެވެ. މި މަސައްކަތް ކުރާ މީހުންގެ 15 އިންސައްތަ އަކީ އަންހެނުންނެވެ. ކޮންމެ އަހަރެއްގެވެސް އޮކްޓޯބަރު އަދި ނޮވެމްބަރަކީ އޮލިވްގެ ވިޔަފާރި އެންމެ ރަނގަޅު ދުވަސްވަރެވެ. ރިޕޯޓްތައް ބުނާގޮތުގައި 2018 ވަނަ އަހަރާ ހަމަޔަށް އާއިރު، އޮލިވް ވިޔަފާރިން ފަލަސްތީނަށް އަހަރެއްގެ މައްޗަށް ޖުމްލަ 191 މިލިއަން ޑޮލަރުގެ އާމްދަނީއެއް ލިބެއެވެ.

އޮލިވް ނުވަތަ ޒައިތޫންނަކީ ފަލަސްތީނުގެ ފަހްރެކެވެ. ނަމަވެސް ފަލަސްތީނު ރައްޔިތުންގެ އަތުން ޒައިތޫނި ގަސްތައް އަތުލުމަށް އިސްރާއީލުން 2023 ވަނަ އަހަރުފެށި ކެމްޕެއިނުގެ ދަށުން ފަލަސްތީނު ރައްޔިތުންނަށް ކުރިން ހައްދާވަރާ ގާތަށްވެސް ޒައިތޫނި ނުހެއްދެއެވެ.