ގަވާއިދާ ހިލާފަށް މޯލްޑިވްސް ޕޮލިޓެކްނިކްގައި ބަހައްޓާފައިހުރި ގިނަ އަދަދެއްގެ ކެމެރާތަކެއް ގެއްލުނު މައްސަލައެއް އޮޑިޓަރ ޖެނެރަލް ފާހަގަކޮށްފިއެވެ.

އޮޑިޓަރ ޖެނެރަލް ނެރުއްވާފައިވާ މިނިސްޓްރީ އޮފް ހަޔަރ އެޑިއުކެޝަނުގެ 2022 ވަނަ އަހަރުގެ ރިޕޯޓްގައި ބުނެފައިވަނީ، ގަވާއިދާ ހިލާފަށް މޯލްޑިވްސް ޕޮލިޓެކްނިކްގެ ބެލުމުގެ ދަށުގައި ހުރި 43 ކެމެރާގެ ތެރެއިން 15 ކެމެރާއެއް ގެއްލިފައިވާކަމަށެވެ. މި މައްސަލައާ ގުޅިގެން އޮފީހުގެ އިސްވެރިޔާއަށް 2022 ވަނަ އަހަރު އެ މައްސަލަ އެންގި ނަމަވެސް ގެއްލުނު ގޮތާ ގުޅޭގޮތުން އެއްވެސް ތަހުގީގެއް ހިންގާފައި ނުވާކަމަށް ރިޕޯޓްގައި ބުންޏެވެ. މީގެ އިތުރުން ކަމާބެހޭ ގަވާއިދތަކާ އެއްގޮތަށް އެއްވެސް ފަރާތެއް ޒިންމާދާރުކުރުމަށް އެއްވެސް ފިޔަވަޅެއް އަޅާފައިނުވާކަންވެސް ވަނީ ފާަގަކޮށްފައެވެ.

އޮޑިޓް ރިޕޯޓްގައި ބުނީ މި މައްސަލަ ފުލުހުންނަށް އަދި ފިނޭންސް މިނިސްޓްރީއަށް އެންގިކަން އެއްވެސ ްލިޔެކިޔުމަކުން އެނގެން ނެތްކަމަށާއި، ކެމެރާތައް ގެއްލިފައިވާ އަހަރު ލިޔެކިޔުމުން ފެންނަން ނެތްކަމަށެވެ.

މި ކެމެރާތަކުގެ ޖުމްލަ އަގަކީ 167،802 ރުފިޔާއެވެ. ކެމެރާތަކަކީ ނެޝަނަލް ސެޓްފިކްޓް 3 އިން ފޮޓޯގްރަޕީ ކޯހުގައި ބޭނުންކުރުމަށް މޯލްޑިވްސް ނެޝަނަލް ސްކިލްސް ޑިވެލޮޕްމަންޓް އޮތޯރިޓީ އާއި ވަރލްޑް ބޭންކުން ހިންގުނު ޕްރޮގްރާމުން ހަދިޔާކުރި ކެމެރާތަކެއްކމަަށެވެ. ގެއްލުނު ކެމެރާތަކުގެ ތެރެއިން 3 ކެމެރާއަކީ ދަރިވަރުންނަށް ދޫކުރި ކެމެރާތަކުން ލިބިފައިނުވާ ކެމެރާތަކެވެ. އަނެއް 12 ކެމެރާ ގެއްލުނު ގޮތް ސާފު ނުވާކަމަށް އޮޑިޓް ރިޕޯޓުގައި ބުނެފައިވެއެވެ.

އޮޑިޓަރ ޖެނެރަލް ވަނީ ކެމެރާތައް ގެއްލުނު މައްސަލާގައި އިހުމާލުވާ ފަރާތްތަކާ ދެކޮޅަށް ފިޔަވަޅު އެޅުމަށް ލަފާދީފައެވެ.