އިނގިރޭސި ޕްރިމިއާ ލީގްގައި ރޭ ލިވަޕޫލް އާއި ބްރެންޓްފޯޑް ބައްދަލުކުރިމެޗް ކުރިން ހީކުރިގޮތާ ހިލާފަށް ބްރެންޓްފޯޑް ކާމިޔާބުކޮށްފިއެވެ.

ބްރެންޓްފޯޑްގެ އަމިއްލަ ދަނޑުގައި ކުޅުނު މިމެޗް ލިވަޕޫލްގެ މައްޗަށް އެޓީމް ކުރިހޯދީ 3-2 ގެ ނަތީޖާއަކުންނެވެ. މެޗް ފަށައިގެން ފުރަތަމަ ފަސް މިނެޓް ތެރޭގައި ބްރެންޓްފޯޑުން ވަނީ ލަނޑެއް ޖަހައި ލީޑް ނަގާފައެވެ. މިލަނޑު ކާމިޔާބުކޮށްދިނީ އޮޓާރާއެވެ. އަދި ފުރަތަމަ ހާފް ނިމުމުގެ ކުރިން 45 ވަނަ މިނެޓް ތެރޭގައި ބްރެންޓްފޯޑްގެ ކެވިން ޝޭޑް ވަނީ އިތުރު ލަނޑެއް ޖަހައި މެޗްގެ ލީޑް ފުޅާކޮށްދީފައެވެ.

މެޗުން ދެ ލަނޑުގެ ލީޑެއް ނަގާފައިވަނިކޮށް، ލިވަޕޫލުން ވަނީ ފުރަތަމަ ހާގް ނިމުމުގެ ކުރިން ލަނޑެއް ޖަހާފައެވެ. މި ލަނޑު ކާމިޔާބުކޮށްދިނީ މިލޯސް ކެރްކެޒް އެވެ. 

ދެވަނަ ހާފް ކުޅުން ފަށައިގެން 60 ވަނަ މިނެޓް ތެރޭގައު ބްރެންޓްފޯޑަށް ލިބުނު ޕެނަލްޓީއެއްގައި ތިއާގޯ މެޗްގެ ނަތީޖާ 3-1 ކަށް ބަދަލުކޮށްފައިވަނިކޮށް ލިވަޕޫލްގެ ސަލާހް ވަނީ 89 ވަނަ މިނެޓް ތެރޭގައި ލަނޑެއް ޖަހައި ޕޮއިންޓެއް ހޯދުމުގެ އުއްމީދު އައުކޮށްފައެވެ. ނަމަވެސް މެޗްގެ ކުޅުން ނިމުނީ 2-3 ގެ ނަތީޖާގައި އޮވެގެންނެވެ. މެޗްގައި ލިވަޕޫލުން މޮޅަށް ކުޅުނު ނަމަވެސް ގޯލަށް އަމާޒުކޮށް ނުރައްކާތެރި ގިނަ ހަމަލާތައް ފޮނުވާލާފައިވަނީ ބްރެންޓްފޯޑުންނެވެ. 

ޕްރިމިއާ ލީގްގައި ރޭ ބްރެންޓްފޯޑް އަތުން ލިވަޕޫލް ބަލިވިއިރު، ލީގްގައި އެންމެފަހުން އެޓީމް މެންޗެސްޓަރ ޔުނައިޓެޑް އާ ދެކޮޅަށް ކުޅުނުމެޗުންވެސް ވަނީ ބަލިވެފައެވެ. ޕޮއިންޓް ތާވަލް އޮތްގޮތަށް ބަލާއިރު ލިވަޕޫލް މިހާރު އޮތީ 15 ޕޮއިންޓާއެކު ތާވަލްގެ 6 ވަނާގައެވެ.

އީޕީއެލް ޕޮއިންޓް ތާވަލް

އިނގިރޭސި ޕްރިމިއާ ލީގްގައި އެންމެފަހުން ވެސްޓްހޭމް ޔުނައިޓެޑާ ލީޑްސް ބައްދަލުކުރިމެޗް 2-1 ގެ ނަތީޖާއަކުން ކާމިޔާބުކުރީ ލީޑްސްއެވެ. ޗެލްސީ އާއި ސަންޑަރލޭންޑް ބައްދަލުކުރިމެޗް 2-1 ގެ ނަތީޖާއަކުން ކާމިޔާބުކުރީ ސަންޑަލޭންޑެވެ.