ފައިސާ ސޫޓްކޭސް ފޭރުނު މައްސަލަ: ލޯންޗާއި ހަތަރު މީހަކު ފުލުހުން އަތުލައިގަނެފި
މޫނު ނިވާކޮށްގެން ތިބި ބަޔަކު އެއާޕޯޓުން ބޭންކް އޮފް މޯލްޑިވްސް (ބީއެމްއެލް)ގެ ފައިސާ ސޫޓުކޭހެއް ފޭރުނު މައްސަލައިގައި ހަތަރު މީހަކު ހައްޔަރުކޮށް، އެމީހުން ފިލަން ބޭނުންކުރި ލޯންޗު އަތުލައިގަނެފިއެވެ.
ދާޚިލީ ސަލަމަތާއި ބެހޭ ވަޒީރު އަލީ އިޙްސާން މިއަދު ކުރެއްވި ޓްވީޓެއްގައި ވަނީ އެކަން ހާމަަކުރައްވާފައެވެ. އަދި އެ މައްސަލައިގައި ފުލުހުންގެ ތަހުގީގަށް ތައުރީފުކުރައްވައި ވަޒީރު ވަނީ އެ ލޯންޗާއި ހަތަރު މީހުން ހައްޔަރުކުރުމުގައި ފުލުހުން ކުރި މަސައްކަތް ފާހަގަކުރައްވާފައެވެ.
ބީއެމްއެލް މުއައްޒަފުންގެ އަތުން ސޫޓުކޭސް ފޭރިގަތް މީހުން ހައްޔަރުކޮށްފައިވާއިރު، އެމީހުން އަތުލައިގަތް ގޮތެއް އަދި އެމީހުން އަތުލައިގަތް ސަރަހައްދާ ގުޅޭ އެއްވެސް މައުލޫމާތެއް ހާމައެއް ނުކުރެއެވެ. އަދި ސޫޓްކޭހަށް ވީގޮތެއްވެސް ސާފެއް ނުވެއެވެ.
ފުލުހުން ބުނި ގޮތުގައި މި މައްސަލަ ހިނގީ މިއަދު ފަތިހު 04:45 ހާއިރުއެވެ. މިކަމާ ގުޅިގެން ފުލުހުންގެ އިދާރާއިން ބުނެފައިވަނީ، ސޫޓްކޭސް ފޭރުނުއިރު، ފުލުހުންގެ ސެކިއުރެޓީ ބޭނުންކޮށްފައި ނުވާކަމަށެވެ.
މި ހާދިސާގައި ސޫޓުކޭސް ފޭރިގަނެފައިވަނީ ވެލާނާ އިންޓަރނޭޝަނަލް އެއާޕޯޓްގެ އައު ޓާމިނަލަށް ވަންނަން ދިޔަ ބޭންކް އޮފް މޯލްޑިވްސްގެ ދެ މުއައްޒަފެއްގެ އަތުންނެވެ.
މި މައްސަލަ ފުލުހުން ތަހުގީގު ކުރަމުން އަންނައިރު، މި ހާދިސާގައި ސޫޓްކޭހުގައި ހުރި ފައިސާގެ އެއްވެސް މައުލޫމާތެއް ބޭންކަކުން ހާމަކޮށްފައެއް ނުވެއެވެ
Advertisement
This content is created and paid for by advertisers and does not involve Voice Journalists
