މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ ފުރަތަމަ ރައީސަކަށް މުޙައްމަދު ފަރުޝަތު އައްޔަންކުރަން ރައްޔިތުންގެ މަޖިލީހުން މިއަދު ފާސްކޮށްފިއެވެ.

އެ މަގާމަށް ފަރުޝަތު އައްޔަނުކުރަން ފާސްކުރީ 49 މެންބަރުންގެ ވޯޓުންނެވެ. އޭނާ އައްޔަނުކުރަން ނުފެންނަ ކަމަށް 9 މެންބަރަކު ވޯޓު ދެއްވިއެވެ.

މީގެ ކުރިން މީޑިޔާ ކައުންސިލުގެ ސެކްރެޓަރީ ޖެނެރަލްގެ މަގާމުގައި ހުންނެވި ފަރުޝަތު، އެ މަގާމަށް އައްޔަނުކޮށްފައިވަނީ އެ ކޮމިޝަނަށް އައްޔަނުކުރެއްވި ހުރިހާ މެންބަރުންނާއި އިންޓަވިއު ކުރުމަށްފަހު، މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީގެ ވެސް ރުހުމާއު އެކުއެވެ.

އެ ކޮމިޝަނުގައި ޖުމްލަ 7 މެންބަރުން ތިއްބަވާއިރު، އޭގެ ތެރެއިން 3 މެންބަރުންނަކީ މަޖިލީހުން އައްޔަނުކުރާ މެންބަރުންނެވެ. އަދި ބާކީ 4 މެންބަރުން ސީދާ މީޑިޔާތަކުގެ ވޯޓުން ހޮވި ނަމަވެސް، އެ ހުރިހާ މެންބަރުން ވަކިކުރުމުގެ ބާރު މަޖިލީހަށް ލިބެއެވެ.

މި ދައުރަށް އެ ކޮމިޝަނަށް ފަރުޝަތުގެ އިތުރުން އައްޔަނުކުރައްވައިފައިވާ މެންބަރުންނަކީ ބްރޯޑްކާސްޓިން ކޮމިޝަންގެ ކުރީގެ ރައީސް ސަފާ ޝަފީގާއި، އެ ކޮމިޝަނުގެ ކުރީގެ މެންބަރު އާމިނަތު ސަރާހަތު އިއްޒަތާއި، ވަގުތު ނޫހުގެ ސިމާހާ ނަސީމާއި މީޑިއާ ކައުންސިލްގެ ކުރީގެ ރައީސް ހުސައިން ޘަގީފް އިހުސާންގެ އިތުރުން، ބްރޯޑްކާސްޓިން ކޮމިޝަންގެ ކުރީގެ މެންބަރު ޒަމްއަތު އަހްމަދު ވަހީދާއި އަބްދުލްއަޒީޒް އިބްރާހީމްއެވެ.

އެ މެންބަރުންގެ ތެރެއިން މަޖިލީހުން އައްޔަނުކުރެއްވީ ސަފާ، ސަރާހަތު އަދި ފަރުޝަތެވެ. ދެން ތިއްބެވި ހަތަރު މެންބަރުންނަކީ ސީދާ މީޑިޔާތަކުން އައްޔަނުކުރެއްވި މެންބަރުންނެވެ.

މިދިޔަ ސެޕްޓެމްބަރު މަހުގެ 16 ވަނަ ދުވަހު މަޖިލީހުން "މޯލްޑިވްސް މީޑިޔާ އެންޑް ރެގިއުލޭޝަން ބިލު" ފާސްކުރިއިރު، އެ ބިލާއި ދެކޮޅަށް މީޑީޔާގައި މަސައްކަތްކުރާ ގިނަ ފަރާތްތަކުން ގެންދިޔައީ ކަންބޮޑުވުން ފާޅުކުރަމުންނެވެ.

އެގޮތުން ނޫސްވެރިންގެ ޚިޔާލު ހޯދުމަށް އެ ކޮމެޓީން މިދިޔަ މަހުގެ ފުރަތަމަ ދުވަހު ބޭއްވި ކޮމެޓީގެ ޖަލްސާގައި ވެސް ހުރިހާ ނޫސްވެރިން ވަނީ އެ ބިލާ ގުޅޭ ގޮތުން ހުރި ކަންބޮޑުވުންތައް ހިއްސާކޮށްފައެވެ.

އެގޮތުން އެ ބިލު ބޭރުކުރުމަށް ގޮވާލައި 150 އަށް ވުރެ ގިނަ ނޫސްވެރިންގެ ސޮޔާއެކު، ނޫސްވެރިންގެ ޖަމިއްޔާ އެމްޖޭއޭއިން ވަނީ މަޖިލީހަށާއި ރައީސް އޮފީހަށް ޕެޓިޝަނެއް ވެސް ހުށަހަޅާފައިވެއެވެ.