ސަރުކާރުން އެމްޓީސީސީ އާއި ހަވާލުކޮށްގެން ހިންގާ ޓެކްސީ ލައިންގެ ޚިދުމަތް އަންނަ ޖެނުއަރީމަހުގެ ތެރޭގައި ފަށާނެކަމަށް ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ. 

ސަރުކާރުން ޓެކްސީ ލައިނުގެ ޚިދުމަތް ތަޢާރަފްކުރުމަށްފަހު އަމާޒުހިފީ އެ ޚިދުމަތް މި އަހަރުގެ ޖުލައި މަހުގެ ކުރީކޮޅު ފެށުމަށެވެ. އެހެން ނަމަވެސް އެ ތާރީޚު މި އަހަރުގެ އޮގަސްޓު މަހުގެ ފަހުކޮޅަށް ފަހުން ބަދަލުކުރިއެވެ.

އޭގެ ފަހުން އެ ޚިދުމަތް ފަށާނެ ދުވަހާއި ގުޅޭ ތަފްސީލެއް ޓްރާންސްޕޯޓު މިނިސްޓްރީ އަދި އެމްޓީސީސީން ވެސް ދީފައެއް ނުވެއެވެ. އެ ޚިދުމަތް އަންނަ ޖެނުއަރީގައި ފަށަން ނިންމައިފައިވާކަން ވަޒީރު ހާމަކުރެއްވީ މިއަދުގެ މަޖިލީހުގެ ޖަލްސާގައެވެ.

އެގޮތުން މެންބަރުން ކުރެއްވި ސުވާލުތަކަށް ޖަވާބުދާރީވެ ވަޑައިގަތުމަށް މަޖިލީހަށް ވަޑައިގެން ވަޒީރު ވިދާޅުވީ، ރާއްޖެއިން ގެންނަން ނިންމާފައިވަނީ އިލެކްޓްރޯނިކް (އީވީ) ކާރުތަކަކަށްވުމާއެކު، އެ އުޅަނދުތައް ރާއްޖޭގެ މާޙައުލާ ބީރައްޓެހި ގޮތަކަށް ފަރުމާކޮށް ގެނެސްފިނަމަ ގިނަ މައްސަލަތަކެއް ކުރިމަތިވާނެކަން އެ ކާރުތައް އުފައްދާ ކުންފުނިންވެސް ފާހަގަކޮށްފައިވާ ކަމަށެވެ.

ސަރުކާރުން ގެންނަން ނިންމައިފައިވާ ޓެކްސީތައް ހުންނާނެ ގޮތުގެ މަންޒަރެއް

އެގޮތުން އެ ކާރުތައް ދުއްވާނީ މޫދާއި ކައިރި މާޙައުލުތަކެއްގައި ކަމުން، ލޮނުގެ އަސަރު ކުޑަވާނެގޮތަށް ކާރުތަކަށް ބައެއް މޮޑިފިކޭޝަންތައް ނުވަތަ ބަދަލުތައް ގެންނަންޖެހޭކަމަށާއި، އެ ޚިދުމަތް ފެށުން ލަސްވާ އެންމެ ބޮޑު ސަބަބަކީ ވެސް އެއީ ކަމަށް ވަޒީރު ވިދާޅުވިއެވެ.

އެހެން ނަމަވެސް ކުރިޔަށް އޮތް ތިން މަހުގެ ތެރޭގައި އެ އުޅަނދުތައް ގެނެސް، ފެށޭނެ ވަރަށް މަސައްކަތްތައް ކުރިޔަށްގެންދަވާ ކަމަށް ވަޒީރު ވިދާޅުވިއެވެ. 

ސަރުކާރުން މީގެ ކުރިން ބުނި ގޮތުގައި، ޓެކްސީ ލައިނުގައި ބޭނުންކުރަނީ 100 އިންސައްތަ ތިމާވެއްޓާއި ރަށްޓެހި އުޅަނދުތަކެވެ. އެ ޚިދުމަތް ދޭން ހަމަޖެހިފައި ވަނީ ވަކި ހާއްސަ އެޕެއް ގާއިމުކޮށް، ރާއްޖެ އިން ބޭރުގައި ދޭ އޫބާ އާއި ގްރޭބްގެ ހިދުމަތްދޭ ސްޓައިލަކަށެވެ.

އެގޮތުން އެ ލައިނުގައި 100 އެއްހާ އުޅަނދު އޮންނާނެއިރު، އެ ޚިދުމަތް ދޭން ފަށާނީ ތިން ފިޔަވައްސަކަށް ބަހާލައިގެންނެވެ. 

އެގޮތުން ފުރަތަމަ ފިޔަވަހީގައި މި އަހަރުގެ ތެރޭގައި މި ހިދުމަތް މާލެ، ހުޅުމާލެ އަދި ވެލާނާ އިންޓަނޭޝަނަލް އެއާޕޯޓަށް ދޭން ފަށާނެ އެވެ.

ދެ ވަނަ ފިޔަވަހީގެ ދަށުން 2026 ވަނަ އަހަރާއި 2027 ވަނަ އަހަރު ވިލިމާލެ އާއި ތިލަފުއްޓަށް އެ ހިދުމަތް ތައާރަފްކުރާނެ އެވެ. ތިން ވަނަ ފިޔަވަހީގައި އެ ހިދުމަތް ތައާރަފު ކުރާނީ ރަސްމާލެ އާއި ގިރާވަރާއި އައްޑު އާއި ފުވައްމުލައް އަދި ކުޅުދުފުއްޓަށް 2028 ވަނަ އަހަރާއި 2029 ވަނަ އަހަރު އެވެ.