ސޫދާނަށް މުޅި ދުނިޔޭގެ ސަމާލުކަން ލިބެންޖެހޭކަމަށް ނަގާކިޔާ ބައެއް ޤައުމުތަކުގެ ހާރިޖީ ވަޒީރުން މިއަދު ވިދާޅުވެއްޖެއެވެ.

ސޫދާނުގެ ދާފޫރަށް ނިސްބަތްވާ އަލްފާޝިރު ސިޓީގައި ރެޕިޑް ސަޕޯޓް ފޯސަސް (އާރުއެސްއެފް) އިން ހިންގަމުންގެންދާ ޖަރީމާތަކާ ގުޅޭގޮތުން އެންމެފަހުން ޖަރުމަނުވިލާތާއި، އިނގިރޭސިވިލާތުގެ އިތުރުން ޖޯޑަންގެ ހާރިޖީ ވަޒީރުން ވަނީ ސޫދާނުގެ މިހާރުގެ ހާލަތާ ގުޅޭގޮތުން ވާހަކަަދައްކާފައެވެ.

ބަހްރެއިނުގައި ކުރިއަށްދާ މަނާމާ ޑައިލޮގްގައި ވާހަކަަދައްކަވަމުން ޖަރުމަނުވިލާތުގެ ހާރިޖީ ވަޒީރު ޖޯހަން ވަޑެފުލް ވިދާޅުވީ، ސޫދާނުގައި ހިނގަމުންދާ އިންސާނިއްޔަތާ ހިލާފް ޖަރީމާތަކަށް ދުނިޔޭގެ ސަމާލުކަން ލިބެންޖެހޭކަމަށެވެ. އެހެންނޫނީ ކުރިއަށް އޮތްތަނުގައި ހާލަތު ވަރަށް ގޯސްވެގެން ހިނގައިދާނޭކަމަށް އޭނާ ވިދާޅުވިއެވެ.

އިނގިރޭސި ހާރިޖީ ވަޒީރު ޔުވެޓް ކޫޕަރ ވިދާޅުވީ، ސޫދާނުގައި އާރުއެސްއެފްގެ އަމަލުތައް ހުއްޓުވިގެން ނޫނީ އެތަނަށް އެހީގެ ތަކެތި ފޮނުވެންވެސް ނެތްކަމަށެވެ. އާރުއެސްއެފްގެ ހަތިޔާރުއެޅި މީހުންގެ ފަރާތުން އިންސާނިއްޔަތާ އެތައް އެތައް އަމަލުތަކެއް ފެންނަމުންދާކަން އޭނާ ފާހަގަކުރެއްވިއެވެ.

ސޫދާނުގައި އޮތް ސަރުކާރު ވައްޓާލައި  ރެޕިޑް ސަޕޯޓް ފޯސަސް (އާރުއެސްއެފް) އިން އަލްފާޝިރު ސިޓީއަށް ވެރިވެ ގަތުމުގެ މަސައްކަތް ކުރިއަށްދާއިރު، އެ ޖަމާއަތުން ދަނީ ސިފައިންނަށާއި އާއްމުންގެ ގިނަ ބަޔަކު މަރަމުންނެވެ. އެގޮތުން އެ ޖަމާއަތާ ނުރުހޭ މީހުން މަރަމުންދާއިރު، އެމީހުން ދަނީ އަންހެނުން ރޭޕްކޮށް، މުސްކުޅިންނަށް އިންސާނިއްޔަތާ ހިލާފް އެތައް އަމަލުތަކެއް ހިންގަމުންނެވެ.

އާރުއެސްއެފުން ޒަމާނީ ހަތިޔާރުގެ އާލާތްތަކާއެކު ހަރަކާތްތެރިވަމުންދާއިރު ސޫދާން ސަރުކާރުން ވަނީ އަރަބި ބައެއް ޤައުމުތަކުން އެމީހުންނަށް ވާގިވެރިވަމުންދާކަމަށް ތުހުމަތުކޮށްފައެވެ. ސޫދާނުގެ އަލްފާޝިރު ސިޓީގައި ހިންގަމުންގެންދާ ޖަރީމާތައް އިތުރުވާން ފެށުމުން ބައެއް ފަރާތްތަކުން ވަނީ އެސިޓީ ދޫކޮށްދިއުމުގެ މަސައްކަތް ފަށާފައެވެ.