ޔުއެފާ ޔޫރޮޕާ ލީގްގައި އެސްޓަން ވިލާ އާއި މެކަބީ ތެލްއަވީވް ބައްދަލުކުރާ މެޗްގެ ސަލާމަތީ ކަންކަން ކަށަވަރުކުރުމަށް ގިނަ އަދަދެއްގެ އޮފިސަރުން ނެރޭނޭކަމަށް އިނގިރޭސިވިލާތުގެ ވެސްޓް މިޑްލޭންޑްގެ ފުލުހުން ހާމަކޮށްފިއެވެ.
މިމަހުގެ 7 ވަނަ ދުވަހު ކުޅުމަށް ހަމަޖެހިފައިވާ އެސްޓަން ވިލާ އާއި އިސްރާއީލްގެ މެކަބީ ތެލްއަވީވް ބައްދަލުކުރާ މެޗާ ގުޅޭގޮތުން ފުލުހުން ބުނެފައިވަނީ، މިހާރު ހަމަޖެހިފައި އޮތްގޮތުން ނަމަ 700 އަށްވުރެ ގިނަ އޮފިސަރުން ނެރޭނޭކަމަށެވެ. މިޑްލޭންޑް ފުލުހުން ބުނީ މެޗާއި ގުޅިގެން ސްޓޭޑިއަމާއި ބޭރުގައި އެއްވެސް ކަހަލަ ހަމަނުޖެހުމެއް ހިންގުމަށް ފުރުސަތު ދޭން ބޭނުން ނުވާކަމަށެވެ. އެގޮތުން ސަލާމަތީ އޮފިސަރުން އަހާއި، ޓްރެއިން ކޮށްފައިވާ ކުއްތާގެ އިތުރުން ޑްރޯންގެ އެހީގައި ސަލާމަތީ ކަންކަން ބެލެހެއްޓުމުގެ މަސައްކަތް ކުރިއަށްދާނޭކަމަށް ފުލުހުން ބުންޏެވެ.
ފުލުހުން ވަނީ ދަނޑަށް އަންނަ އެއްވެސް ފަރާތަކުން ހަމަނުޖެހުމަކަށް މަގުފަހިވާނޭ އެއްވެސް ކަމެއް ނުކުރުމަށް އެދިފައެވެ. އިސްރާއީލްގެ ކަމާބެހޭ ފަރާތްތަކުން ވަނީ އިނގިރޭސިވިލާތަށް މެކަބީ މެޗް ބަލަން ނުދިއުމަށް އެ ކްލަބްގެ ސަޕޯޓަރުންގެ ކިބައިން އެދިފައެވެ.
ޣައްޒާގައި އިސްރާއީލުން ހިންގަމުންދާ ޖަރީމާތަކާ ދެކޮޅަށް މުޒާހަރާތައް ބާއްވަމުން އަންނަ އިނގިރޭސި ރައްޔިތުން ހިމެނޭ ޖަމިއްޔާތަކުން ވަނީ މެކަބީ މެޗް ކެންސަލްކުރުމަށް ގޮވާލައި މުޒާހަރާތައް ކުރިއަށްގެންދާނޭކަމަށް ބުނެފައެވެ.
އެސްޓަން ވިލާ މެކަބީ މެޗްގެ ސަލާމަތީ ފިޔަވަޅުތައް ވަރުގަދަކޮށްފައިވާއިރު، ދަނޑަށް އެއްވެސް ބާވަތެއްގެ ދިދައެއް ވެއްދުންވެސް ވަނީ މަނާކޮށްފައެވެ.
ޣައްޒާ ހަނގުރާމައާ ގުޅިގެން މުޅި ޔޫރަޕްގައިވެސް ވަނީ ޔަހޫދީންނާ ދެކޮޅު ހަރަކާތްތަކެއް ފަށާފައެވެ. މީގެ ތެރޭގައި ކުޅިވަރު ދަނޑުތަކުގައިވެސް އިސްރާއީލާ ދެކޮޅު ހަރަކާތްތައް ހިންގަމުންދެއެވެ. އިސްރާއީލާ ދެކޮޅު ފަރާތްތަކުން ބުނަމުންދަނީ ބައިނަލްއަޤްވާމީ ކުޅިވަރު ދަނޑުތަކުން އިސްރާއީލަށް ނިސްބަތްވާ ޓީމުތައް ބޭރުކުރަން ޖެހޭކަމަށާއި، އެމީހުން ދަނީ ޣައްޒާގައި ކުޑަކުދިންނާއި އަންހެނުން ގަތުލުކުރަމުންކަމަށެވެ.
Advertisement
This content is created and paid for by advertisers and does not involve Voice Journalists
