ޔުއެފާ ޔޫރޮޕާ ލީގްގައި ރޭ އިނގިރޭސިވިލާތުގެ އެސްޓަންވިލާއިން ފަސޭހަކަމާއެކު އިސްރާއީލްގެ މެކަބީ ތެލްއަވީވް ބަލިކޮށްފިއެވެ.

އެސްޓަން ވިލާގެ ދަނޑު ވިލާ ޕާކްގައި ކުޅުނު މިމެޗް އެޓީމުން ކާމިޔާބުކުރީ 0-2 ނަތީޖާއަކުންނެވެ. މެޗްގައި އެސްޓަން ވިލާއަށް ގޯލް ހުޅުވާލަދިނީ ފުރަތަމަ ހާފްގެ އިތުރުވަގުތުގެ ކުޅުމުގެ ތެރޭގައި މާޓްސެންއެވެ. ވިލާގެ ދެވަނަ ލަނޑަކީ ލިބުނު ޕެނަލްޓީއަކުން 59 ވަނަ މިނެޓް ތެރޭގައި މަލެން ކާމިޔާބުކޮށްދިން ލަނޑެކެވެ.

މެޗްގައި މޮޅަށްކުޅެ ގިނަ ހަމަލާތައް އުފައްދާފައިވަނީ ވިލާއެވެ. އެޓީމުން މެކަބީގެ ކޮޅަށް 8 ހަމަލާ ފޮނުވާލިއިރު އިސްރާއީލްގެ ޓީމުން ވަނީ މެޗްގައި ގިނަ ފައުލްތަކެއް ކޮށްފައެވެ.

މިމެޗް ކުރިއަށްގެންގޮސްފައިވަނީ ސަލާމަތީ ފިޔަވަޅުތައް ވަރަށް ވަރުގަދަކޮށެވެ. އެހެންކަމުން މިމެޗްގައި ތެލްއަވީވްގެ ވަރަށް މަދު ސަޕޯޓަރަކަށް ނޫނީ ދަނޑަށް ވަދެވިފައެއް ނުވެއެވެ.

އިސްރާއީލާ ދެކޮޅަށް މުޒާހަރާކުރަނީ،... ފޮޓޯ: ބީބީސީ

މެޗް ހިނގަމުންދިޔައިރުވެސް ފަލަސްތީނަށް ތާއީދުކުރާ ފަރާތްތަކުން ދިޔައީ މުޒާހަރާކުރަމުންނެވެ. މުޒާހަރާގެ ބައިވެރިންގެ އަޑަކަށް ވެފައިއޮތީ އިސްރާއީލުން ޣައްޒާގައި ނަސްލު ނައްތާލުމަށް ހިންގަމުންގެންދާ ޖަރީމާތަކެވެ. 

މިމެޗްގެ ސަލާމަތީ ކަންކަން ބެލެހެއްޓުމަށް 700 އަށްވުރެ ގިނަ ފުލުހުން ވަނީ ހަރަކާތްތެރިވެފައެވެ. މީގެ އިތުރުން ޓްރެއިންކޮށްފައިވާ ކުއްތާ އަދި ދްރޯންފަދަ ވަސީލަތްތައްވެސް ވަނީ ސަލާމަތީ ކަންކަން ބެލެހެއްޓުމުގައި ބޭނުންކޮށްފައެވެ.