ދިވެއްސަކު އޭނާގެ އަނބި މީހާއަށް އޮޅުވާލައިގެން ކުންފުނީގެ މެނޭޖިންގ ޑިރެކްޓަރު އަދި މައި ހިއްސާދާރުގެ ގޮތުގައި ގިނަ އަހަރުތަކެއްވަންދެން ގެންގުޅެފިއެވެ.

އަނބިމީހާއަށް އޭނާއަކީ ކުންފުނީގެ މެނޭޖިންގ ޑިރެކްޓަރުކަމާއި އަދި މައި ހިއްސާދާރެއްކަން އެނގުނީ ދަރަނީގެ މައްސަލައެއްގައި ކޯޓުން ދާންޖެހި ޝަރީއަތުގައި ކުރިއަށްދިޔަ މުއާމަލާތްތަކަށްފަހުއެވެ. މިކަމެއް ޖެހުނީ ބީއެމްސީ ޓްރާންސްޕޯޓް އެންޑް ޕްރޮޖެކްޓްސް ޕްރައިވެޓް ލިމިޓެޑް ނަމަކަށް ކިޔާ މި ކުންފުނިން ދައުލަތުގެ ޓެކްސް އިދާރާ، މީރާއަށް ދައްކަންޖެހޭ ފައިސާގެ މައްސަލައެއް އެ އޮތޯރިޓީން ސިވިިލްކޯޓަށް ހުށަހެޅުމުންނެވެ.

އިކޮނޮމިކް މިނިސްޓްރީގެ ބިޒްނަސް ޕޯޓަލްއިން ދައްކާގޮތުން 2008 ވަނަ އަހަރު އުފެއްދި މި ކުންފުނީގެ މެނޭޖިންގ ޑިރެކްޓަރަކީ މިބުނާ އަނބިމީހާއެވެ. ބޯޑް ޑިރެކްޓަރުންގެ ގޮތުގައި ހިމެނެނީ އަނބިމީހާ އާއެކު ފިރިމީހާއެވެ. 

ސިވިލްކޯޓުގެ ޝަރީއަތުގެ މަޖިލީހުގައި އަނބިމީހާ ބުނެފައިވަނީ، ބީއެމްސީ ޓްރާންސްޕޯޓް އެންޑް ޕްރޮޖެކްޓްސް ޕްރައިވެޓް ލިމިޓެޑްގެ މައި ހިއްސާދާރަކީ 2018 އަހަރާ ހަމަޔަށް އޭނާގެ ފިރިމީހާ ކަމަށާއި، ކުންފުނީގެ އެމްޑީކަމުގެ މަގާމާއި މައި ހިއްސާދާރުގެ ގޮތުގައި އޭނާ އިންނަކަން އެނގުނީ މައްސަލައިގެ އަމުރުތައް ލިބުމުންކަމަށެވެ. އަނބިމީހާ ބުނެފައިވަނީ ކުންފުނީގައި އެއްވެސް ފައިސާއެއް އަދި މުދަލެއް ހުންނަ ކަމެއްވެސް ނޭނގޭކަމަށާއި، ދަރިން ކައިރި އެހުމުންވެސް އެ ކުދިންނަށްވެސް ނޭނގޭކަމަށެވެ.

ކޯޓުން ވަނީ ބީއެމްސީން މީރާއަށް ދައްކަންޖެހޭ 9 ލައްކައަށްވުރެ ގިނަ ރުފިޔާ ދެއްކުމަށް ހުކުމްކޮށްފައެވެ. ދަރަނީގެ މައްސަލާގައި އަނބިމީހާ ބުނެފައިވަނީ އެ ފައިސާ މީރާއަށް ދެއްކޭނެ ތަނަވަސްކަމެއް ނެތްކަމަށެވެ.

ބީއެމްސީ ޓްރާންސްޕޯޓް އެންޑް ޕްރޮޖެކްޓްސް ޕްރައިވެޓް ލިމިޓެޑަކީ މީގެ ކުރިން 2013 ވަނަ އަހަރު އެކުންފުނީގެ ވާހަކަ މީޑިއާގައި ފެތުރުނު ކުންފުންޏެކެވެ. އެގޮތުން އައްޑޫ މުލިކެޑެ ފަރަށް 2011 ވަނަ އަހަރުގެ ނޮވެމްބަރު މަހު އެރި ތައިލެންޑްގެ މަސްބޯޓެއް ފަރަށްއެރި މައްސަލާގައި ބޮޑު އަދަދަކުން ބޯޓު ޖޫރިމަނާކުރިއިރު، އެ ބޯޓު ފުންކުރުމުގެ މަސައްކަތުގައި އުޅުނީ ބީއެމްސީއެވެ. ބޯޓު ފުންކުރި މަސައްކަތް ކުރިގޮތުން އީޕީއޭއިން އެ ކުންފުނި ޖޫރިމަނާކުރިކަން ފާހަގަކޮށްލެވެއެވެ.