ރާއްޖެ ސަރަހައްދަށް ގަވާއިދާހިލާފަށް ވަދެގެން އުޅެނިކޮށް ދިވެހި އަސްކަރިއްޔާއިން ޑްރޯން ބޭނުންކޮށްގެން އަތުލައިގަތް ލަންކާގެ ޑްރަގް ބޯޓުގައި ތިބި މީހުން އަނބުރާް ލަންކާއަށް ގެންދިޔުމުގެ މަސައްކަތް އެ ޤައުމުގެ ސަރުކާރުން ފަށައިފިއެވެ.
ސްރީލަންކާގެ ބައެއް ނޫސްތަކަށް ޕަބްލިކް ސެކިއުރިޓީ މިނިސްޓަރު، އާނަންދަ ވިޖެޕަލަ މައުލޫމާތު ހިއްސާކުރަމުން ވިދާޅުވިކަމަށް އެ ނޫސްތަކުން ބުނީ އެމީހުން ގެނައުމަށް ރާއްޖޭގެ ޚާރިޖީ ވުޒާރާ އާއި މަޝްވަރާ ފަށާފައިވާކަމަށެވެ. އެގޮތުން އެކަމާއި ގުޅޭ ރަސްމީ ލިޔެކިޔުންތައް މިހާރު ބަދަލުކުރެވިފައިވާނެ ކަމަށްވެސް ވަނީ ރިޕޯޓްކޮށްފައެވެ.
ރާއްޖޭގެ ކަމާބެހޭ ފަރާތްތަކުން އެ ބޯޓު މާލެ ސަރަހައްދަށް ގެނެސް މައްސަލައިގެ ތަހުގީގު މިހާރު ފަށާފައިވާއިރު އެ ތަހުގީގަށް އެއްބާރުލުން ދިނުމަށް ލަންކާގެ ފުލުހުންގެ ނާކޮޓިކްސް ބިއުރޯގެ ވަފުދެއްވެސް މިހާރު ރާއްޖެ ފުރާފައިވާކަމަށް އެ ނޫހުގައި ރިޕޯޓްކޮށްފައިވެއެވެ.
އެ ނޫސްތަކުން ރިޕޯޓުކުރާ ގޮތުގައި އެ ބޯޓުގައި ތިބީ ލަންކާގެ ނެގަމްބޯއަށް ނިސްބަތްވާ މީހުންނެވެ.
އިއްޔެ އެ ނޫސްތަކުން ރިޕޯޓުކުރި ގޮތުގައި، ރާއްޖޭގެ ސިފައިން އަތުލައިގަތީ އެ ޤައުމުގެ ބޯޓެކެވެ. އެ ބޯޓުގައި 300 ކިލޯގެ މަސްތުވާތަކެތި ހުރިކަމަށްވާއިރު، އެ އުޅަނދުގައި 6 މީހުން ތިބިކަމަށްވެސް ވަނީ އެ ނޫސްތަކުން ރިޕޯޓުކޮށްފައިވެއެވެ.
މިކަމާ ގުޅޭގޮތުން ދިވެހި ފުލުހުންވެސް ވަނީ އަތުލައިގަތް ބޯޓުގައި މަސްތުވާތަކެތި ހުރިކަމަށް ބުނެފައެވެ. ނަމަވެސް މިކަމާ ގުޅޭ އިތުރު ތަފްސީލެއް މިހާތަނަށް ވެސް ފުލުހުން ހާމައެއް ނުކުރެއެވެ.
އެ އުޅަނދު އަތުލައިގަތްކަން ހާމަކުރަމުން އެމްއެންޑީއެފުން މީގެ ކުރިން ބުނެފައިވަނީ ރާއްޖޭގެ ކަނޑުގެ ސަރަހައްދުގައި ގަވާއިދާހިލާފަށް ވަދެއުޅުނު އެ ބޯޓު އަތުލައިގަނެފައިވަނީ، އެމްއެންޑީއެފް އެއާކޯއިން ޑްރޯން ބޭނުންކޮށްގެން ހިންގި ސަވެއިލަންސެއްގައިކަމަށެވެ.
އެމްއެންޑީއެފް ކޯސްޓްގާޑުގެ ބެލުމުގެ ދަށަށް ގެނެސްފައިވަނީ ބުދަދުވަހުގެ ރޭ ވ. ފޮއްތެޔޮމުލީގެ އިރުން 137 ނޯޓިކަލް މޭލު ބޭރުގައި ހަރަކާތްތެރިވަމުން ދަނިކޮށެވެ.
Advertisement
This content is created and paid for by advertisers and does not involve Voice Journalists
