ބޭންކް އޮފް މޯލްޑިވްސްއިން އަހަރުގެ މިހާތަނަށް 6.5 ބިލިއަން ރުފިޔާގެ ލޯނު ދޫކޮށްފައިވާކަމަށް އެ ބޭންކުން ހާމަކޮށްފިއެވެ.

ބީއެމްއެލުން މިއަދު ބުނީ އަހަރުގެ މިހާތަނަށް ލޯނު ދޫކުރި މިންވަރު އިތުރުވެފައިވާއިރު، ތިންވަނަ ކުއާޓަރ ނިމުނުއިރު  ބޭންކުގެ ޖުމްލަ ލޯން ޕޯޓްޕޯލިއޯ 23.7 ބިލިއަން ރުފިޔާއަށް އަރާފައިވާކަމަށެވެ. 

މިއަހަރުގެ މިހާތަނަށް ބީއެމްއެލުން އެންމެގިނައިން ލޯނު ދޫކޮށްފައިވަނީ، ޓޫރިޒަމަށާއި، އަމިއްލަ ފަރުދުންނަށެވެ.

• ޓުއަރިޒަމް – 8.71 ބިލިއަން ރުފިޔާ

• އަމިއްލަ ފަރުދުންނަށް – 5.34 ބިލިއަން ރުފިޔާ

• ޢިމާރާތްކުރުމަށާއި ގެދޮރުވެރިކަމަށް – 5.09 ބިލިއަން ރުފިޔާ

• ދަތުރުފަތުރާއި ކޮމިއުނިކޭޝަނަށް – 2.40 ބިލިއަން ރުފިޔާ

• ވިޔަފާރިތަކަށް – 1.04 ބިލިއަން ރުފިޔާ

• އެހެނިހެން ދާއިރާތައް – 1.11 ބިލިއަން ރުފިޔާ

ބީއެމްއެލުން ބުނީ އެކި ދާއިރާތަކަށް ބޭންކުގެ ރިސްކްތްރެޝްހޯލްޑް މިންގަނޑުގެ ތެރެއިން ލޯނުދޫކުރަމުންދާކަމަށެވެ.

ބީއެމްއެލްގެ އެންމެފަހުގެ މާލީބަޔާނަށް ބަލާއިރު، ނިމިގެންދިޔަ ތިންވަނަ ކުއާޓަރުގައި އެ ބޭންކަށް ވަނީ 475 މިލިއަން ރުފިޔާގެ ފައިދާއެއް ހޯދާފައެވެ. މި މުއްދަތުގައި ބޭންކުގެ ޖުމްލަ އެސެޓް 51.1 ބިލިއަން ރުފިޔާއަށް އަރާފައިވާއިރު، ކަސްޓަމަރުންގެ ޑިޕޮސިޓް 33.7 ބިލިއަން ފުރިޔާއަށް އަރައެވެ. ބޭންކުގެ ކެޕިޓަލް އަދި ލިކުއިޑިޓީ ރޭޝިއޯ ގާނޫނު ލާޒިމުކުރާ މިންގަނޑަށްވުރެ މަތީގައި ދެމެހެއްޓިފައިވާކަން ބޭންކުން ވަނީ ފާހަގަކޮށްފައެވެ.