ހުޅަނގު އެފްރިކާގެ އެންގޯލާގެ އަސްކަރިއްޔާ މިޒަމާނާ އެއްފެންވަރަށް ތަރައްޤީކުރުމަށް އިންޑިއާއިން 200 މިލިއަން އެމެރިކާ ޑޮލަރުގެ ކްރެޑިޓް ލައިނެއް ފޯރުކޮށްދޭން ނިންމައިފިއެވެ.
އިންޑިއާއިން މި އެހީ އިއުލާންކުރީ އެންގޯލާގެ ރައީސް މިދިޔަ ހަފްތާގައި އިންޑިއާއަށް ކުރެއްވި ރަސްމީ ދަތުރުފުޅުގައެވެ.
ދެ ޤައުމުގެ ވެރިންގެ މަޝްވަރާތަކަށްފަހު އިންޑިއާގެ ބޮޑުވަޒީރު ނަރެންދްރަ މޯދީ ވިދާޅުވީ ޓެރަރިޒަމަކީ ދުނިޔޭގެ ހުރިހާ ހިސާބަކަށްވެސް ދިމާވެފައިވާ ގޮންޖެހުމެއްކަމަށާއި، ޓެރަރިޒަމާއި ދެކޮޅަށް އިންޑިއާއިން ކުރަމުންދާ މަސައްކަތުގައި އެންގޯލާއިން އިންޑިއާއާއެކު އޮންނާނެކަން ހާމަކޮށްފައިވާތީ އެކަމަށް ޝުކުރު ދަންނަވާކަމަށެވެ.
އަދި އެފްރިކަން ޔޫނިއަންގެ ރިޔާސަތާއި އެންގޯލާއިން ހަވާލުވުމުން، އެކަމަށްވެސް މޯދީ މަރުޙަވާ ވިދާޅުވިއެވެ. އަދި އެފްރިކަން ޔޫނިއަންއަށް ޖީ-20 ގެ މެމްބަރުކަން ލިބުނީ އިންޑިއާއިން ޖީ-20ގެ ރިޔާސަތު ބެލެހެއްޓިއިރުކަން މޯދީ ފާހަގަކުރެއްވިއެވެ.
އެންގޯލާގެ އަސްކަރިއްޔާ ޒަމާނީކޮށް ތަރައްޤީކުރުމަށް އިންޑިއާއިން ދިން ލައިން އޮފް ކްރެޑިޓްގެ ދަށުން އެންގޯލާއިން ހަތިޔާރު ގަންނާނީ އިންޑިއާއިންކަމަށް އިންޑިއާގެ މިނިސްޓްރީ އޮފް އެކްސްޓަރނަލް އެފެއަރޒްއިން ބުންޏެވެ. އެގޮތުން މިހާރުވެސް އިންޑިއާގެ އަމިއްލަ އަދި ސަރުކާރުގެ ދިފާޢީ ކުންފުނިތަކާއެކު ހަތިޔާރާއި ތަކެތި ގަތުމުގެ މަޝްވަރާތައް ކުރިއަށްދާކަމަށް އިންޑިއާއިން ބުންޏެވެ.
އަސްކަރީ އެހީތެރިކަމުގެ އިތުރުން އެހެނިހެން ބައެއް ދާއިރާތަކުންވެސް ގުޅުން ބަދަހިކުރުމާ ބެހޭ އެއްބަސްވުންތަކުގައި ދެޤައުމުން ވަނީ ސޮއިކޮށްފައެވެ.
Advertisement
This content is created and paid for by advertisers and does not involve Voice Journalists
