މަޝްހޫރު އެކްޓަރު ދަރުމެންދުރަ، އުމުރުން 89 އަހަރުގައި މަރުވެއްޖެ
ބޮލީވުޑްގެ މަޝްހޫރު އަދި ލެޖެންޑަރީ އެކްޓަރު ދަރުމެންދުރަ (ދަރޭ) ފަރުވާދެމުން ދަނިކޮށް އުމުރުން 89 އަހަަރުގައި މަރުވެއްޖެއެވެ.
ދަރޭ މަރުވެފައިވަނީ ސިއްހީ ހާލަތު ގޯސްވެ މުމްބާއީގެ ބްރީޗް ކޭންޑީ ހޮސްޕިޓަލުގައި ފަރުވާދެމުންދަނިކޮށް މިއަދުގެ ވަގުތެއްގައެވެ. މީގެ ދުވަސްކޮޅެއްކުރިން ނޭވާލުމުގެ ނިޒާމަށް ކުރިމަތިވި މައްސަލަތަކާހެދި ދަރޭ ވަނީ ހޮސްޕިޓަލަށް ގެންގޮސްފައެވެ.
ދަރޭގެ މަރާ ގުޅިގެން އިންޑިއާގެ ފިލްމީ އިންޑަސްޓްރީގެ އެކި ފަރާތްތަކާއި އޭނާގެ ފޭނުން އަންނަނީ ހިތާމަފަޅުކުރަމުންނެވެ. ދަރޭގެ މަރާ ގުޅިގެން އިންޑިއާގެ ބޮޑުވަޒީރު ނަރެންދްރަ މޯދީ އެކްސްގައި ކުރެއްވި ޕޯސްޓެއްގައި ސިފަކުރައްވާފައިވަނީ މިއީ އިންޑިއާ ސިނަމާގެ ޒަމާނެއް ނިމިދިއުންކަމަށެވެ. ދަރޭއަކީ އޭނާ ކުޅުނު ރޯލްތަކުގައި ނަމޫނާ އެކްޓިންއެއް ދައްކުވައިދިން އާދަޔާހިލާފް ސަހްސިއްޔަތެއްކަމަށް މޯދީ ވަނީ ވިދާޅުވެފައެވެ.
ހިންދީ ސިނަމާގައި ދަރޭ އެންމެބޮޑަށް މަޝްހޫރުވެގެން ދިޔައީ ޝޯލޭ ފަދަ ފިލްމުތަކުންނެވެ. ދަރޭއަކީ ދިވެހިންގެ ތެރޭގައިވެސް ވަރަށް މަގްބޫލް އެކްޓަރެކެވެ.
ފިލްމުގެ މަސައްކަތްތަކުން މުޅިން އެއްފަރާތް ނުވިނަމަވެސް ދަރޭ މިހާތަނަށް ގެންދިޔައީ އެ ދާއިރާގައި ކޮންމެވެސް ވަރަކަށް މަސައްކަތް ކުރަމުންނެވެ. ފިލްމީ ދައިރާއިން އެއްފަރާތް ވެލުމަށްފަހު ދަރޭގެ ހުރިހާ ވަގުތެއް ހޭދަކުރަމުން އައިސްފައިވަނީ އޭނާގެ ދަނޑުތަކުގައެވެ. ދަރޭއަކީ ދަނޑުވެރިކަމަށް ވަރަށް ޝައުގުވެރިވި މީހެއްކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
