ރަސްމާލެއިން ވަރަށް އަވަހަށް 15،000 ގޯތި ދޫކުރަން ހުޅުވާލާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިކަން ހާމަކުރެއްވީ މިއަދު ބޭއްވި ޖުމްހޫރީ ދުވަހުގެ ރަސްމީ ޖަލްސާގައި ވާހަކަދައްކަވަމުންނެވެ. މި ޖަލްސާގައި ވާހަކަދައްކަވަމުން ރައީސް ވިދާޅުވީ ކުރިއަށްއޮތް 5 މަހެއްހާ ދުވަހުގެ ތެރޭގައި ރަސްމާލެއިން ގޯތި ދޫކުރުމަށް ހުޅުވާލާނެ ކަމަށެވެ. ރައީސް ވިދާޅުވީ 15،000 ގޯތީގެ އިތުރުން 7،000 ހައުސިން ޔުނިޓްގެ މަސައްކަތްވެސް ފައްޓަވާނޭކަމަށެވެ.

ރަސްމާލެއިން ދޫކުރުމަށް ނިންމާފައިވާ ގޯތިތައް ދޭނީ މާލޭ ރަށްވެހިންނާއި މާލޭގައި ދިރިއުޅެމުން އަންނަތާ ގިނަދުވަސްވީ ފަރާތްތަކަށް ކަމަށެވެ. މީގެ އިތުުރުން މާލެއިން މީހުންނަށް ލިބިފައިވާ ބިމުން ލާޖައްސާ އުސޫލުންވެސް ގޯތި ދޫކުރެވޭނޭކަމަށްވެސް ރައީސް ވިދާޅުވިއެވެ.

ރަސްމާލެ ހިއްކުމުގެ ސްޕީޑް ކުރިއަށްއޮތް ދުވަސްތަކުގައި 3 ގުނަ އިތުރުކުރައްވާނޭކަމަށްވެސް ރައީސް ވިދާޅުވިއެވެ. މާލެ ސަރަހައްދަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލެއް ގެނައުމުގެ ގޮތުން މިއަހަރު ނިމުމުގެ ކުރިން މާލޭގައި 3،000 ހައުސިން ޔުނިޓް އެޅުމަށް ހުޅުވާލާނޭކަމަށްވެސް ރައީސް ވިދާޅުވިއެވެ. މީގެ އިތުރުން އިންޑިއާ ސަރުކާރުގެ ލައިން އޮފް ކްރެޑިޓްގެ ދަށުން 4000 ހައުސިން ޔުނިޓް ތަރައްޤީކުރުމުގެ ގޮތުން ކުރަންޖެހޭ މަސައްކަތްވެސް މިހާރު ކުރިއަށްދާކަމަށް ރައީސް ފާހަގަކުރެއްވިއެވެ.

ރައީސް ވިދާޅުވީ ކުރިއަށްއޮތްތަނުގައި ވަރަށް އަވަހަށް 7،000 ހައުސިން ޔުނިޓްއެޅުމުގެ އަމަލީ މަސައްކަތްވެސް ފެށިގެންދާނޭކަމަށެވެ.