ލައިސަންސް ނުނަގައި އިންވެސްޓްމަންޓް ސްކީމްތައް ނުހިންގުމަށް ސީއެމްޑީއޭއިން އަނެއްކާވެސް އިލްތިމާސްކޮށްފި
ކެޕިޓަލް މާކެޓް ޑިވެލޮޕްމަންޓް އޮތޯރިޓީ، ސީއެމްޑީއޭގެ ހުއްދަނެތި އިންވެސްޓްމަންޓް ސްކީމްތައް ނުހިންގުމަށް އެ އިދާރާއިން އިލްތިމާސްކޮށްފިއެވެ.
ސީއެމްޑީއޭއިން ނެރުނު ބަޔާނެއްގައި ބުނެފައިވަނީ ރާއްޖޭގައި ޤާނޫނީ ހުއްދަނެތް ބައެއް ފަރާތްތަކުން އެކި ބާވަތްތަކުގެ ސެކިއުރެޓީޒް ނުވަތަ އިންވެސްޓްމަންޓް ޕްރޮޑަކްޓް ގަނެވިއްކުމުގެ ހިދުމަތާއި އެ ހިދުމަތްތައް މެދުވެރިކޮށް މާލީ މަންފާ ހޯދައިދިނުމަށްޓަކައި އިންވެސްޓްކުރުމުގެ ފުރުސަތު އާއްމުނަށް ހުށަހަޅަމުންދާކަމުގެ މައުލޫމާތު އެ އިދާރާއަށް ލިބިފައިވާކަމަށެވެ.
ސީއެމްޑީއޭއިން ބުނީ އިންވެސްޓްމަންޓް ފަންޑް ހިންގުމާއި އިންވެސްޓްކުރުމަށް ލަފާދިނުމާއި މަންޑް މެނޭޖްކުރުންފަދަ ހިދުމަތްތައް ދިނުމަކީ އެ އިދާރާއިން ލައިސަންސް ނަގައިގެން ކުރަންޖެހޭ ކަމެއްކަމަށެވެ. އެގޮތުން ލައިސަންސް ނެތި ކޮންމެ ފަރާތަކުންވެސް ބައިވެރިވެވޭގޮތަށް އާންމުކޮށް ފުރުސަތު ހުޅުވާލައިގެން ސޯޝަލް މީޑިއާގެ ވަސީލަތްތައް މެދުވެރިކޮށް އެބާވަތުގެ ކަންކަން ނުކުރުމަށް ސީއެމްޑީއޭއިން ވަނީ އިލްތިމާސްކޮށްފައެވެ.
އިންވެސްޓްކުރަން ލިބޭ ހުށަހެޅުންތައް ބަލައި އެފަރާތަކީ ލައިސަންސް އޮތް ފަރާތެއްކަން ކަށަވަރުކުރުމަށްފަހު ނޫނީ އެފަދަ ކަންކަމުގައި ބައިވެރިނުވުމަށް އެދެމުން ސީއެމްޑީއޭއިން ވަނީ، ލައިސަންސް ނެތި އެފަދަ ކަމެއް ކުރާކަން އެނގޭނަމަ އެފަދަ މައުލޫމާތެއް އެ އިދާރާއަށް ހުށަހެޅުމަށް އެދިފައެވެ.
ސީއެމްޑީއޭގައި ރަޖިސްޓްރީކޮށްދީފައިވާ ފަންޑްތަކުގެ މައުލޫމާތާއި، އިންވެސްޓްކުރުމަށް ލަފާދޭ ފަރާތްތައް އެ އޮތޯރިތީގެ ވެބްސައިޓުން ފެންނަން ހުންނާނޭކަމަށްވެސް ސީއެމްޑީއޭއިން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
