ދިވެހިރާއްޖޭގެ ހާއްސަ އިގްތިސާދީ ސަރަހައްދުން ފެނުނު، ސްރީލަންކާގެ މަސް ބޯޓެއްކަމަށް ބެލެވޭ "އަވިޝްކާ ޕުތާ"ގެ މައްސަލަ ޝަރީއަތުން ނުނިމެނީސް އެމީހުނަށް އެއްވެސް ތަނަކަށް ނުދެވޭނޭކަމަށް ފުލުހުން ބުނެފިއެވެ.

ލަންކާ ޑްރަގް ބޯޓާ ގުޅޭގޮތުން އެޤައުމުގެ ބައެއް މީޑިއާތަކުން ވަނީ އެމީހުން އަނބުރާ ގެނައުމުގެ މަސައްކަތްތަކެއް ކުރިއަށްދާކަމަށް ބުނެފައެވެ. ނަމަވެސް މިއަދު ދިވެހި ފުލުހުން ބުނެފައިވަނީ، މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެވުނު 5 މީހުން ތިބީ ބަންދުގައި ކަމަށެވެ. އެމީހުން ޝަރީއަތް ނިމެންދެން ބަންދު ކުރުމަށް ކޯޓުން އަމުރުކޮށްފައިވާކަމަށް ފުލުހުން ބުންޏެވެ.

ސްރީލަންކާގެ މަސް ބޯޓެއްކަމަށް ބެލެވޭ "އަވިޝްކާ ޕުތާ" ދިވެހިރާއްޖޭގެ ހާއްސަ އިގްތިސާދީ ސަރަހައްދަށް ވަދެފައިވަނީ ހުއްދަނެތިކަމަށް ފުލުހުން ބުންޏެވެ. އެމްއެންޑީއެފް އިން އެ ބޯޓު ހިފަހައްޓައި ފުލުހުންނާ ހަވާލު ކުރުމުން، ބޯޓު ބަލައި ފާސްކުރި އިރު ވަގުތީ ބަރުދަނުގައި 355 ކިލޯއަށްވުރެ ގިނަ މަސްތުވާތަކެތި ކަމަށް ބެލެވޭ ތަކެތި ވަނީ ފެނިފައެވެ.

މި މައްސަލަ ދިވެހިރާއްޖޭގެ ގުޅުންހުރި ގާނޫތަކުގެ ދަށުން، ދިވެހި ފުލުހުންގެ ޚިދުމަތް، މޯލްޑިވްސް ނޭޝަނަލް ޑިފެންސް ފޯސް، ސްރީލަންކަން ނޭވީ، އަދި ސްރީލަންކަން ޕޮލިސް ގުޅިގެން ތަހުގީގު ކުރަމުންދާކަމަށް ފުލުހުން ވަނީ ބުނެފައެވެ. އަދި ތަހުގީގު ކުރިއަށް ގެންދިއުމުގައި އަމަލުކުރާނެ ގޮތްތަކާ ގުޅޭ މަޝްވަރާތައް ތަހުގީގުގައި ބައިވެރިވާ އިދާރާތަކާއެކު ކުރަމުން ގެންދާކަމަށް ފުލުހުން ވަނީ ބުނެފައެވެ.

މި މައްސަލައިގެ ތުހުމަތުގައި ސްރީލަންކާއަށް ނިސްބަތްވާ ފަސް މީހުން ވަނީ ހައްޔަރުކޮށްފަ އެވެ. އެއީ 39، 42، 28، 34 އަދި 63 އަހަރުގެ 5 ފިރިހެނުންނެވެ.