އަދުގެ ސަރުކާރު ވެރިކަމާ ހަވާލުވުމަށްފަހު އަންހެނުން ބާރުވެރިކުރުވުމަށް ފެށި މަސައްކަތްތަކުގެ ނަތީޖާ ފެންނަން ފަށާފައިވާކަމަށް އިޖުތިމާޢީ އަދި އާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ. 

ރެހެނދި އެވޯޑް ދިނުމަށް މިރޭ ބޭއްވި ހަފްލާގައި ވާހަކަދައްކަވަމުން މިނިސްޓަރު ވިދާޅުވީ، ރައީސް ޑޮކްޓަރު މުއިއްޒު ވެރިކަމަށް ވަޑައިގަތުމަށްފަހު އަންހެނުންގެ ހުރި ކަންބޮޑުވުންތައް ބައްލަވައި، ވެރިކަމަށް ވަޑައިގަތުމަށްފަހު އަންހެނުންގެ ހުރި ކަންބޮޑުވުންތަކަށް ހައްލު ގެނައުމަށް މަސައްކަތް ފެށިގެންދިޔަ ކަމަށެވެ. 

އަންހެނުންގެ ކަންބޮޑުވުން ބެލިއިރު އެންމެ ފާހަގަކުރެވުނު ކަމަކީ ވިޔަފާރި ފެށުމަށް އަންހެނުންނަށް ލޯނު ހޯދުމުގައި ހުރި އުނދަގޫތައް ކަމަށާއި، އެގޮތުން މި ސަރުކާރުން އަންހެނުންނަށް ހާއްސަކޮށް ލޯން ސްކީމެއް ތައާރަފްކުރެވިފައިވާކަމަށެވެ. އަންހެނުންނަށް ހާއްސަކޮށް 100 މިލިއަން ރުފިޔާގެ ލޯނު ސްކީމެއް ތައާރަފްކުރެވުނުއިރު، އެލޯނުގެ 25 އިންސައްތަ ނުކުޅެދުންތެރިކަން ހުންނަ މީހުންނަށް ހާއްސަކުރެވިގެންދިޔަކަން މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ މިހާތަނަށް އާއިރު 83 ފަރާތަކަށް ލޯނު ދޫކުރެވިފައިވާކަމަށާއި، މީގެ ތެރެއިން 45 އިންސައްތަ މީހުން ވިޔަފާރިފަށައިއެކަމުގެ މަންފާ އެފަރާތްތަކަށް ލިބެމުންދާކަމަށެވެ. އަދި ޒަމާނީ ޓެކްނޮލޮޖީއާ ވިޔަފާރީގެ އުކުޅުތައް ބޭނުންކޮށްގެން އަންހެނުންނަށް އަމާޒުކޮށް ވިޔަފާރީގެ ތަމްރީނުތައް ކުރިއަށްގެންދެވުނުކަން މިނިސްޓަރު ވިދާޅުވިއެވެ. 

މިނިސްޓަރު ވިދާޅުވީ ސަރުކާރުން އަންހެނުން ބާރުވެރިކޮށް ދައުލަތް ހިންގުމުގައިވެސް އެފަރާތްތަކުގެ ހިއްސާ މިއަދު އިތުރުކޮށްފައިވާކަމަށެވެ. އެގޮތުން ސަރުކާރު ހިއްސާވާ ބޯޑުތަކަށް އައްޔަނުކުރާ އަންހެނުންގެ ނިސްބަތް އިތުރުކޮށް، ސީއެމްޑިއޭ، އެންސްޕާ އަދި އާސަންދަ ފަދަ ތަންތަނުގެ އެންމެ އިސް މަގާމުތަކުގައި މިއަދި އަންހެނުން ތިބިކަން މިނިސްޓަރު ވިދާޅުވިއެވެ.

މީގެ އިތުރުން އަންހެނުންނަށް ކުރާ އނިޔާ ހުއްޓުވުމަށާއި، ޤާނޫނީ ގޮތުން އަންހެނުންނަށް ލިބެންޖެހޭ ރައްކާތެރިކަން ހޯދައިދުނުމަށްވެސް ގިނަ މަސައްކަތްތަކެއް ކުރައްވަމުން އަންނަކަން މިނިސްޓަރު ވަނީ ފާހަގަކުރައްވާފައެވެ.