ނެޝަނަލް ސޯޝަލް ޕްރޮޓަކްޝަން އޭޖެންސީ (އެންސްޕާ) ގެ މުހިންމު ބައެއް ހިދުމަތްތައް ވަންގަވް އަށް ބަދަލުކޮށްފިއެވެ.

އެންސްޕާގެ ބައެއް ހިދުމަތްތައް ވަންގަވް ޕްލެޓް ފޯމަށް ބަދަލުކޮށް އެކަން ރަސްމީކޮށް އިއުލާނުކޮށްފައިވަނީ ރޭ އެކަމަށްޓަކައި ބޭއްވި ރަސްމިއްޔާތެއްގެ ތެރެއިންނެވެ.

- ނުކުޅެދުންތެރިކަން ހުންނަ ފަރާތްތަކަށް ދޭ އެލަވަންސް

- ތެރަޕީ ބޭނުންވާ ފަރާތްތަކަށް ދޭ އެހީ

- އެކަނިވެރި މައިންނަށްދޭ އެލަވަންސް

- ހާލުގައި ޖެހިފައިވާ ފަރާތްތަކަށް ކާބޯތަކި ފޯރުކޮށްދިނުން

- ފޯސްޓާ ޕޭރެންޓުންނަށް ދޭ އެލަވަންސް

އެންސްޕާގެ ސީއީއޯ ހީނާ ވަލީދު... ފޮޓޯ؛ އެންސްޕާ

އެންސްޕާގެ މި ހިދުމަތްތައް ވަންގަވްއަށް ބަދަލުކުރުމާ ގުޅިގެން ސީއީއޯ ހީނާ ވަލީދު ވިދާޅުވީ، މިއީ ވަރަށް ގިނަދުވަހުގެ މަސައްކަތެއް ކަމަށާއި، މިއީ ސަރުކާރުން ރައްޔިތުންނަށްދޭ ހިދުމަތްތައް ލުއިފަސޭހަކޮށްދިނުމަށް ސަރުކާރުން ގެންގުޅޭ ސިޔާސަތުގެ ދަށުން ކުރެވުނު މަސައްކަތެއް ކަމަށެވެ. 

އެންސްޕާއިން ދެމުން އަންނަ ބައެއް ހިދުމަތްތައް ރައްޔިތުންނަށް ލިބޭލެއް ލަސްވުމަކީ ރައްޔިތުންގެ ވަރަށްބޮޑު ޝަކުވާއަކަށް ވެފައި އޮންނަ ކަމެކެވެ. އެގޮތުން ތެރަޕީ ފަރުވާއަށް ފޯމުތައް ލައިގެން އެންސްޕާގެ ޖަވާބަކަށް އެދި ދިގު އިންތިޒާރެއް ކުރަންޖެހުމަކީ ރައްޔިތުންގެ ވަރަށްބޮޑު ޝަކުވާއަކަށް ވެފައި އޮންނަ ކަމެކެވެ.

ހީނާ ވިދާޅުވީ އެންސްޕާގެ މިފަދަ ހިދުމަތްތައް ވަން ގަވް ފަދަ ޑިޖިޓަލް ޕްލެޓްފޯމެއްގެ ތެރެއިން މުއާމަލާތްތައް ހިނގަން ފެށުމުން ރައްޔިތުންނަށް ހިދުމަތްދިނުމަށް މީގެކުރިން ހޭދަވާ ވަގުތަށް ކުޑަވެ، އަވަހަށް ހިދުމަތް ފޯރުކޮށްދެވިގެންދާނޭކަމަށެވެ. ހީނާ ވިދާޅުވީ މިވަގުތު ވަން ގަވްއަށް 5 ހިދުމަތެއް ގުޅާލެވުނު ނަމަވެސް ކުރިއަށް އޮތްތަނުގައި އެންސްޕާގެ އިތުރު ހިދުމަތްތައް ތައާރަފް ކުރެވިގެންދާނޭކަމަށް ހީނާ ފާހަގަކުރެއްވިއެވެ.

ވަންގަވްއަކީ ސަރުކާރުގެ މުއައްސަސާތަކުން ދެމުންގެންދާ ހިދުމަތްތައް އެއް ޕްލެޓްފޯމަކުން ލިބިދޭގޮތަށް ފަރުމާކޮށްފައިވާ ނިޒާމެކެވެ. ވަންގަވް މެދުވެރިކޮށް އިދާރާތަކުން ހޯދަން ބޭނުންވާ ހިދުމަތްތަކަށް ފަސޭހައިން ފޯމު ހުށަހަޅައި ސަބްމިޓް ކޮށްލެވެއެވެ.