އިންޑިއާގެ ޚާރިޖީ ވަޒީރު ޑރ. ސުބްރަމާނިއަމް ޖައިޝަންކަރު މިފެށޭ ހަފްތާގައި ރަޝިޔާއަށް ވަޑައިގަންނަވާނެކަމަށް އިންޑިއާއިން ބުނެފިއެވެ.
މިމަހުގެ 17 ވަނަ ދުވަހު ރަޝިޔާގައި ބާއްވާ ޝަންހާއީ ކޯޕަރޭޝަން އޯގަނައިޒޭޝަން (އެސް.ސީ.އޯ)ގެ ބައްދަލުވުމެއްގައި ބައިވެރިވެވަޑައިގަތުމަށް ޑރ. ޖައިޝަންކަރު މޮސްކޯއަށް ވަޑައިގަންނަވާނެކަމަށާއި، މި ދަތުރުފުޅުގައި ރަޝިޔާގެ ރައީސް ވްލަޑިމިއަރ ޕުޓިން އިންޑިއާއަށް ކުރެއްވުމަށް ހަމަޖެހިފައިވާ ދަތުރުފުޅާ ގުޅޭ މަޝްވަރާތައް ރަޝިޔާގެ ޚާރިޖިއްޔާގެ ބޭފުޅުންނާއެކު ކުރައްވާނެކަމަށް މަސްދަރުތަކާއި ހަވާލާދީ އިންޑިއާގެ ނޫސްތަކުން ބުނެއެވެ. އަދި މިމަޝްވަރާތަކަށް ރަޝިޔާގެ ޚާރިޖީ ވަޒީރު ސަރްގޭ ލަވްރޯފްއާއެކު ޖައިޝަންކަރު ބައްދަލުކުރައްވާނެކަމަށް ބެލެވެއެވެ.
ޕުޓިން އިންޑިއާއަށް ވަޑައިގަންނަވާނީ ޑިސެމްބަރު 4 އިން 5 އަށް ދިއްލީގައި އޮންނަ އިންޑިއާ-ރަޝިޔާ ސަމިޓަށެވެ.
އެމެރިކާއަށް ކުރައްވާ ދަތުރުފުޅެއްގައި ޑރ. ޖައިޝަންކަރު މިވަގުތު ހުންނެވީ ނިއުޔޯކްގައެވެ. ޕުޓިންގެ ދަތުރުފުޅާ ގުޅޭ ގޮތުން ދެޤައުމުގެ ކަމާ ބެހޭ ފަރާތްތަކުންވެސް އަދި ރަސްމީކޮށް އެއްޗެއް ނުބުނެއެވެ. އެހެންނަމަވެސް ޖައިޝަންކަރު ރަޝިޔާއަށް ވަޑައިގަންނަވާކަމާއި، މި ދަތުރުފުޅުގައި ލަވްރޯފްއާއެކު ބައްދަލުކުރައްވާނެކަމަށް ރަޝިޔާގެ ޚާރިޖިއްޔާގެ ތަރުޖަމާނު މަރިޔާ ޒަޚަރޯވާ ވަނީ ހާމަކުރައްވާފައެވެ.
Advertisement
This content is created and paid for by advertisers and does not involve Voice Journalists
