ނަފްސާނީ ބައްޔަށް ކުރަންޖެހޭ ހުރިހާ ހަރަދެއް ކުރިއަށްއޮތްތަނުގައި އާސަންދައިން ހަމަޖެއްސުމަށް ނިންމާފައިވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައްޔިތުންނާއެކު ކުރިއަށް - ހަފްތާ 104 ފާހަގަކުރުމަށް ޒުވާނުންގެ މަރުކަޒުގައި ބޭއްވި ޖަލްސާގައި ވާހަކަދައްކަވަމުން ރަައީސް ވިދާޅުވީ ނަފްސާނީ ބައްޔަކީ ދިވެހިންގެ މެދުގައި ވަރަށް ކަންބޮޑުވާވަރަށް ބޮޑުވެފައި އޮތް މައްސަލައެއްކަމަށާއި، މިކަމަށް ކުރަންޖެހޭ ހަރަދު އާސަންދައިން މީގެ ކުރިން އެއްކޮށް ކަވަރ ނުކުރާކަމަށެވެ.

ރައީސް ވިދާޅުވީ އަންނަ ޖެނުއަރީމަހުން ފެށިގެން ނަފްސާނީ ބައްޔަށް ކުރާ ހަރަދެއް އާސަންދަ މެދުވެރިކޮށް ހަމަޖެހިގެންދާނޭކަމަށެވެ.

ރައީސް ވާހަކަފުޅު ދައްކަވަނީ.. ފޮޓޯ: ރައީސް

ރައީސް ވިދާޅުވީ އިޖުތިމާއީ ދާއިރާ ހަރުދަނާ ކުރުމަށް މި ސަރުކާރުން ހާއްސަ އިސްކަމެއްދީގެން މަސައްކަތް ކުރައްވަމުން ގެންދަވާކަމަށެވެ. އެގޮތުން ނުކުޅެދޭ ކުދިންނަށް ވަޒީފާދިނުމާއި އިސް ރަށްވެހިންނަށް އިސްކަންދީގެން ހިދުމަތްތައް ފޯރުކޮސްދިނުމަކީ ސަރުކާރުން ހާއްސަ އިސްކަމެއްދޭކަމެއްކަމަށް ރައީސް ފާހަގަކުރެއްވިއެވެ.

ރައީސް ވިދާޅުވީ ނުކުޅެދޭ ކުދިންނަށް ވަޒީފާގެ ފުރުސަތުތައް ފަހިކޮށްދިނުމަށް ކުރިއަށްގެންދާ މަސައްކަތްތަކުގެ ދަށުން މިދިޔަ މަހުގެ ނިޔަލަށް 333 މީހުންނަށް ވަޒީފާ ދީފައިވާކަމަށެވެ. އެގޮތުން ސަރުކާރުގެ ކުންފުނިތަކުން 280 މީހަކަށް ވަޒީފާ ދެވުނުއިރު، ސިވިލްސާވިސްގެ ތެރެއިން 45 މީހަކަށް ވަޒީފާ ހަމަޖައްސައިދީފައިވާކަން ރައީސް ފާހަގަކުރެއްވިއެވެ.