މިދިޔަ މަހުގެ ތިންވަނަ ދުވަހުގެރޭގެ ވަގުތެއްގައި އެމްޑީޕީން މާލޭގައި ބޭއްވި އެއްވުމުގެ ބައިވެރިން ޖިނާއީ ކުށުގެ ޢަމަލުތަކެއް ހިންގިކަމަށް ތުހުމަތުކުރެވޭ މައްސަލާގައި ހައްޔަރުުކުރި މީހުންނަށް ދައުވާ ނުކުރަން ނިންމައިފި އެވެ.

މި މައްސަލަައިގެ ތުހުމަތު އޮތީ ހުސައިން ޝާކިރާއި ޔައުގޫބު އަބްދުﷲ އާއި ޔާސިރު އަބްދުއްލަތީފާއި ހަސަން ސަލާހާއި އާޒީމް އަލީގެ އިތުރުން އަލީ ޖުމާން އަދި މުޙައްމަދު ހަލަފް އިބްރާހީމް އެވެ.

ޕީޖީ އޮފީހުން ބުނީ މި މައްސަލާގައި ގާނޫނުލްއުގޫބާތުގެ 532 ވަނަ މާއްދާގެ ދަށުން ގާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްދުގައި ހުރަސްއެޅުމުގެ ކުށުގެ ދައުވާ އާއި 533 ވަނަ މާއްދާގެ ދަށުން ގާނޫނު ހިންގުމަށް ހުރަސްއެޅުމުގެ ކުށުގެ ދައުވާ ކުރުމަށް އެދި ދިވެހި ފުލުހުންގެ ހިދުމަތުގެ ފަރާތުން މައްސަލަ އެ އޮފީހަށް ހުށަހަޅާފައިވާ ކަމަށެވެ.

ނަމަވެސް މި މައްސަލާގައި ލިބިފައިވާ ހެކިތަކަށް ރިއާޔަތްކޮށް ބެލިއިރު، ތުހުމަތުކުރެވޭ އަމަލުތައް އެމީހުން ހިންގާފައިވަނީ އަސާސީ ހައްގެއް ބޭނުންކުރުމުގެ ތެރެއިން ކަމަށް ބުރަވެވޭތީ އާއި، މި މީހުންގެ އަމަލެއްގެ ސަބަބުން އެއްވެސް މީހަކަށް އަނިޔާއެއް ނުވަތަ މުދަލަކަށް ގެއްލުމެއް ލިބިފައިނުވާތީ، މި މީހުންގެ މައްޗަށް ދައުވާކުރުމުގެ މަސްލަހަތު އޮތް ކަމަށް ޕީޖީ އޮފީހަށް ނުފެންނާތީ، މައްސަލާގައި ދައުވާ ނުކުރުމަށް ނިންމާފައިވާ ކަމަށެވެ.

މި މުޒާހަރާއާ ގުޅިގެން މާލޭގައި ބޭއްވި އެއްވުމާ ގުޅިގެން އިތުރު 10 މީހެއްގެ މައްސަލަ ފުލުހުން ގެންދަނީ ތަހުގީގު ކުރަމުން ކަމަށާ އެ ބައިގެ ތަހުގީގު ނިމުމުން ދައުވާކުރުމާމެދު ގޮތެއް ނިންމާނެ ކަމަށެވެ.