ފަތުވެރިކަމާ ގުޅޭގޮތުން ކ. މާފުށީގައި ކުރިއަށް ދިޔަ ހަފްލާއެއްގައި ކުރީގެ ރައީސް މުޙައްމަދު ނަޝީދު، ރާއްޖޭގެ މީހުން ދިރިއުޅޭ ރަށްރަށުގައި ބަނގުރަލާއި އޫރުމަސް ވިއްކުމަށް ހިތްވަރުލިބޭ ގޮތަށް ދެއްކެވި ވާހަކަތަކާ ގުޅިގެން، ކަންބޮޑުވުން ފާޅުކޮށް، އެވާހަކަތައް އެންމެ ހަރުކަށި ޢިބާރާތުން ކުށްވެރިކުރާ ކަމަށް އެމްޑީޕީއާ ކެވެލި ޖެހިގެން އޮތް ޢަދާލަތު ޕާޓީން ބުނެފި އެވެ.

އަދާލަތު ޕާޓީން މިއަދު ނެރުނު ބަޔާނެއްގައި ބުނެފައި ވަނީ ބަނގުރަލާއި އޫރުމަހަކީ ކީރިތި ޤުރުއާނުގެ ޤަތުޢީ ދަލީލުތަކުން ނަހީކުރައްވާ ކަނޑައެޅިގެން ޙަރާމްކުރައްވާފައިވާ ތަކެތި ކަމަށެވެ. އެކަމުގެ ދަލީލުތައް ބަޔާންކޮށްފައިވެ އެވެ.

އެ ޕާޓީން ބުނީ ބަނގުރަލާއި އޫރުމަހަކީ މާތް الله  ޙަރާމް ކުރައްވާފައިވާ އެއްޗެއް ކަމުން އަހަރުމެން މުސްލިމުންނަށް އެއިން މަންފާ ޙާޞިލު ކުރުމަކީ ހުއްދަވެގެންވާނެ ކަމެއް ނޫން ކަމަށެވެ. އަދި އެ ވިއްކައިގެން ލިބޭ އާމްދަނީއަކީ ވެސް އިސްލާމީ ޝަރީޢަތުގައި ޙަރާމް އެއްޗެއް ކަމަށެވެ. އެކަމުގެ ސާފު ދަލީލުތައްވެސް ބަޔާން ކޮށްފައިވެ އެވެ.

ރާއްޖޭގެ ރިސޯޓްތަކުގައި ފަތުރުވެރިންނަށް ޒަމާނުއްސުރެ މިފަދަ ތަކެތި ވިއްކަމުން އައުމަކީ، އާންމު ރައްޔިތުން ދިރިއުޅޭ ރަށްރަށުގައި މިފަދަ މުންކަރާތްތައް ޢާއްމުކުރުމަށްވާ ޙުއްޖަތެއް ނޫން ކަަމަށާ މިފަދަ ތަކެތި ޢާއްމުކުރުމާއި ޢާއްމުކުރުމަށް ގޮވާލުމަކީ އިސްލަމީ ޝަރީޢަތުގައި ޙަރާމްކަމެއް ކަމަށްވެސް ގިނަ އަދަދެއްގެ ދީނީ އިލްމުވެރީންގެ ބައިވެރިވުން އޮވެގެން އުފެއްދި އަދާލަތުގެ ބަޔާނުގައިވެ އެވެ.

"...އެހެންކަމުން، ރައީސް ނަޝީދު، މީހުން ދިރިއުޅޭ ރަށްރަށުގައި އެކަންކަން ކުރުމަށް ހިއްވަރު ލިބޭ ގޮތަށް ދެއްކެވި ވާހަކައަކީ އެއްގޮތަކަށް ވެސް ބަލައިގަނެވޭނެ ވާހަކަތަކެއް ނޫނެވެ. އަދި ކިއެއް އެއީ އިސްލާމީ ޝަރީޢަތާއި، ދިވެހި ސަގާފަތާ ކަނޑައެޅިގެން ޚިލާފު ވާހަކަތަކެއް ކަމުގައި ވީހިނދު، އެފަދަ ވާހަކަތައް ތަކުރާރު ނުކުރުމަށާއި އެކަމުން ތައުބާވެ ދިވެހިރައްޔިތުންގެ ކިބައިން މާޢާފަށް އެދުމަށް ވެސް ގޮވާލަމެވެ," އަދާލަތުގެ ބަޔާނުގައިވެ އެވެ.