2023 ވަނަ އަހަރުގެ ރިޔާސީ އިންތިޚާބާ ހަމައަށް އައިއިރު އެމްޑީޕީގެ ތެރޭގަޔާއި ކުރީގެ ރައީސް މުޙައްމަދު ނަޝީދު އާއި ކުރީގެ ރައީސް އިބްރާހިމް މުޙައްމަދު ޞާލިޙްއާ ދެމެދު ހިނގާފައިވާ ކަންކަމަކީ ހިނގައިގެން ނުވާނެ ކަންކަން ކަމަށް އެ ދެރައީސުން ވިދާޅުވެއްޖެއެވެ.
ރައީސް ނަޝީދުއާއި ރައީސް ޞާލިޙް މިއަދު ބޭއްވި ނޫސްވެރިންގެ ބައްދަލުވުމުގައި އެ ދެބަސްވުމާއި ގުޅޭ ގޮތުން ނޫސްވެރިއަކު ކުރި ސުވާލަށް ޖަވާބު ދެއްވަމުން ރައީސް ޞާލިޙް ވިދާޅުވީ، އޭރުގައި ދިމާވި ކަންތައްތަކަކީ ވެގެން ވާނެ ކަންކަމެއް ނޫން ކަމަށާ، އެހެން އެކަން ދިމާވީ ދެކެވެން ހުރި ވަރަށް ގިނަ ވާހަކަތަކެއް ނުދެކެވި ދިއައީމަ ކަމަށެވެ.
އަޅުގަނޑަށް ހީވަނީ 2023 އާ ހަމައަށް އައިއިރުގައި އެއީ ވެގެންވާނެ ކަމެއް ނޫން އެ ވެދިޔައީކީ. އަޅުގަނޑުހިތުން އޭރު އަޅުގަނޑުމެންނަށް ދެކެވެންހުރި ވަރަށް ގިނަ ވާހަކަތަކެއް ނުދެކެވި ހުރީމަ އެ ހިސާބަށް ދިޔަކަމަށް ގަބޫލު ކުރެވެނީ. އެހެންވީމާ ދެން އެކަހަލަ ކަމެއް ދިމާ ނުވާގޮތަށް އަޅުގަނޑުމެންނަށް އެއަށްވުރެ ކައިރިން ވާހަކަތަކެއް ދެއްކިއްޖެއްޔާ އެކަހަލަ ލޮޅުމެއް ނާރާނެ
ރައީސް ޞާލިޙް
އެ ހަމަނުޖެހުމާ ގުޅޭގޮތުން ވާހަކަ ދައްކަވަމުން ރައީސް ނަޝީދު ވިދާޅުވީ، އޭރު އެމަނިކުފާނާއި ރައީސް ޞާލިހް ހުންނެވީ ދައުލަތުގެ ދެ ބާރުގެ ގޮތުގައި ކަމަށެވެ.
ދެން ގާނޫނު އަސާސީ ސިފަ ކޮށްފަ އޮންނަ ގޮތެއްވެސް އޮވޭ. އަދި ދިވެހި ރައްޔޮތުން ބާރުތައް ވަކިކުރާ ވާހަކަ ދެއްކި މިންވަރުވެސް އަޅުގަނޑުމެން ދެމީހުން ވަރަށް ރަނގަޅަށް ހަނދާންހުރޭ. އެހެންވީމާ އަޅުގަނޑުމެން ދެމީހުންނަށްވެސް ވިސްނޭ ދެ ބާރުކަން މިއީ.
ރައީސް ނަޝީދު
”އެހެންވީމާ ތިހާ ބައިވަރު ހަމަނުޖެހުން ތަކެއް. ތިހާ ބައިވަރު ހަމަ ނުޖެހުންތަކެއް އަދި އޮތްކަމަށް އެހެން ކުއްލިއަކަށް ދެކެން އަޅުގަނޑަށް އުނދަގޫވެސްމެ“ ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ، މަޖިލީހުން ކުރަމުންދިޔަ ކަންކަމަށް ރައީސް ޞާލިޙު ”ކުޑަކޮށްވެސް ހުރަސް ނާޅުއްވާ ކަމަށާ“ އެމަނިކުފާނަކީވެސް ދިގު ބަރުލަމާނީ ޙަޔާތެއް ވޭތުކުރެއްވި ބޭފުޅެއް ކަމަށެވެ.
ދެން ރައީސުލްޖުމްހޫރިއްޔާ ކުރައްވާ ކަންކަމަށް މަޖިލީހުން އެޅެން އޮތް މިންވަރަކަށް ހުރަސްއެޅުން އެއީ ގާނޫނު އަސާސީ ސިފަކޮށްފައި މި އޮތް ގޮތަކީ.
ރައީސް ނަޝީދު
މިއާއެކު ރައީސް ނަޝީދު ވިދާޅުވީ، ދައުލަތުގެ ތެރޭގައި ހިނގަމުންދިޔަ ކަންކަމަކީ އެދެބޭފުޅުންގެ ޒާތީ ކަމެއްގެ ދެކުމަކީ އެދިލައްވާ ކަމެއް ނޫން ކަމަށާ، އަދި ކަންކަން ދިޔައީ އެހެން ކަމަށް ގަބޫލުވެސް ނުކުރައްވާ ކަމަށެވެ.
”ޒާތީ ނަމަ އަޅުގަނޑުމެން ދެމީހުން ދޭތެރޭގައި ވަރަށް ބައިވަރު ވާހަކަ ހުންނާނެ.“ ނަޝީދު ވިދާޅުވިއެވެ.
ނަޝީދު ވިދާޅުވީ، އެ ދެރައީސުން މިހާރު ތިއްބެވީ އެއްބޭފުޅެއް އަނެއް ބޭފުޅެއްގެ މައްޗަށް ކުރައްވާފައިވާ ތުހުމަތުތަކާ ނުވަތަ ކިޔުއްވި ފާޑުކިޔުންތައް ފަހަތަށް ޖައްސާލުމަށްފަހުގައި ކަމަށެވެ.
Advertisement
This content is created and paid for by advertisers and does not involve Voice Journalists
