މިއަހަރުގެ ޑިސެމްބަރުމަހާއި ކުރިއަށްއޮތް ޖެނުއަރީމަހުގެ އުމްރާގެ އަޅުކަން އަދާކުރުމަށް 7،000 ހަށްވުރެ ގިނަ މީހުން މައްކާއަށް ދަތުރުކުރާނޭކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ކޮންމެ އަހަރެއްގެވެސް މިދުވަސްވަރަކީ ރާއްޖެއިން ގިނަ ބަޔަކު އުމްރާގެ އަޅުަކަން އަދާކުރުމަށް ދަތުރުކޮށް އުޅޭ ދުވަސްވަރެކެވެ. މިނިސްޓަރު ޝަހީމް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ މިފަހަރު އެކަނިވެސް ޑިސެމްބަރު އަދި ޖެނުއަރީގެ އުމްރާގެ އަޅުަކަން އަދާކުރުމަށް ގިނަ ބަޔަކު މައްކާއަށް ދިއުމަށް ހަމަޖެހިފައިވާކަމަށެވެ. މިނިސްޓަރު ވިދާޅުވީ އުމްރާއަށް ދިއުމަށް ހަމަޖެހިފައިވާ މީހުން މިހަފްތާގައި ފުރާނޭކަމަށެވެ.

މިނިސްޓަރު ވިދާޅުވީ މިފަހަރުއެކަނިވެސް ރާއްޖެއިން 7726 މީހުން އުމްރާގެ އަޅުކަން އަދާކުރުމަށް ދާނޭކަމަށެވެ. މިފަހަރު އުމްރާއަށްދާ މީހުންގެ ތެރެއިން އަމިއްލަ ކުންފުނިތަކުގެ ބެލުމުގެ ދަށުން ދަތުރުކުރާ ބައެއް ގްރޫޕްތައް މިދިޔަ ހަފްތާގައިވެސް ވަނީ ފުރާފައެވެ. އެގޮތުން އެންމެ ފުރަތަމަ ގްރޫޕް މިމަހުގެ 21 ވަނަ ދުވަހު ފުރާފައިވާއިރު، އެންމެ ފަހު ގްރޫއްޕު ރާއްޖެއިން ފުރާނީ ޖެނުއަރީމަހުގެ 9 ވަނަ ދުވަހުއެވެ.

އިސްލާމިކް މިނިސްޓްރީން މައުލޫމާތު ދޭ ގޮތުގައި މިފަހަރު އެންމެ ގިނަ މީހުން އުމްރާއަށް ދިއުމަށް ފުރާނީ ޑިސެމްބަރުމަހުގެ 28 ވަނަ ދުވަހުއެވެ. އެދުވަހު އެކަނިވެސް އެއްހާހަށްވުރެ ގިނަ މީހުން ފުރާނެއެވެ.

މިފަހަރުގެ ސްކޫލް ބަންދު ޑިސެމްބަރާ ދިމާވުމުން މީގެ ކުރީއަހަރުތަކަށްވުރެ ގިނަ މީހުން އުމްރާގެ އަޅުކަން އަދާކުރުމަށް މައްކާއަށް ދަތުރުކުރާކަން ފާހަގަކޮށްލެވެއވެެ.