އިންޑިއާ އަސްކަރިއްޔާގެ ގާބިލުކަން އިތުރުކުރުމަށްޓަކައި 790 ބިލިއަން ރުޕީސް (ގާތްގަނޑަކަށް 8.78 ބިލިއަން އެމެރިކާ ޑޮލަރު) ގެ ދިފާއީ ސާމާނު ގަތުމުގެ ހުއްދަ އިންޑިއާ ސަރުކާރުން ހޯމަ ދުވަހު ދީފިއެވެ. މި ހުއްދަ ދީފައިވަނީ ދިފާއީ ވަޒީރު ރާޖްނާތު ސިންގް ރިޔާސަތު ބަލަހައްޓަވާ ޑިފެންސް އެކިއުޒިޝަން ކައުންސިލް އިންނެވެ.

އިންޑިއާގެ ދިފާއީ ވުޒާރާއިން ބުނި ގޮތުގައި، މި ބަޖެޓު ބޭނުންކުރާނީ ރާޑަރު، ރޭޑިއޯ ސިސްޓަމް، އަމާޒަށް ވާސިލުވާ ގޮވާތަކެތި، ޑްރޯން ދިފާއީ ނިޒާމުތައް އަދި ދުރު ރާސްތާގެ ފާރަވެރިވުމުގެ މިޝަންތަކަށް ބޭނުންކުރާ އުޅަނދުތައް ގަތުމަށެވެ. މިއީ ޒަމާނާ، މިސަރަހައްދަށް އަންނަ ބަދަލުތަކާ އެއްގޮތަށް އިންޑިއާ އަސްކަރިއްޔާ ޒަމާނީ ކުރުމަށް ބޮޑުވަޒީރު ނަރެންދްރަ މޯދީ ފެއްޓެވި މަސައްކަތުގެ ބައެކެވެ.

މި އާބަޖެޓާއެކު، އެއްގަމު ސިފައިންނަށް އާޓިލަރީ ރެޖިމެންޓުތަކަށް ބޭނުންވާ ލޮއިޓަރިންގ މުނިޝަންސް، ލުއި ރާޑަރުތައް، ޕިނާކާ ސިސްޓަމަށް ބޭނުންވާ ދުރު ރާސްތާގެ ގައިޑަޑް ރޮކެޓް، އަދި ޑްރޯން ދެނެގަނެ ހުއްޓުވާ "އިންޓެގްރޭޓެޑް ޑްރޯން ޑިޓެކްޝަން އެންޑް އިންޓަޑިކްޝަން ސިސްޓަމް ގަތުމަށް ވަނީ ނިންމާފައެވެ.

އަދި އިންޑިއާ ކަނޑުގެ ސިފައިންނަށް ބޭނުންވާ ހައި ފްރީކުއެންސީ ސޮފްޓްވެއަރ ޑިފައިންޑް ރޭޑިއޯ، މޭންޕެކް ސިސްޓަމްތައް ގަތުމަށާއި، އިންޑިއާ ކަނޑުގެ ސަރަހައްދުގައި ޖާސޫސީ މަސައްކަތްތައް ދެމެހެއްޓެނިވި ގޮތެއްގައި ކުރުމަށްޓަކައި ހޭލް މަރުކާގެ ޑްރޯންތައް ކުއްޔަށް ހިފުމުގެ ހުއްދަ ވަނީ ދީފައެވެ. މީގެ އިތުރުން ވައިގެ ސިފައިންނަށް ބޭނުންވާ އޮޓޮމެޓިކް ޓޭކް-އޮފް އެންޑް ލޭންޑިންގ ރެކޯޑިންގ ސިސްޓަމަކާއި، އަސްޓްރާ މިސައިލާއި، ފުލް މިޝަން ސިމިއުލޭޓަރުތަކުގެ އިތުރުން ދުރު ރާސްތާގެ ގައިޑެންސް ކިޓްތައް ހޯދުމަށް ވަނީ ނިންމާފައެވެ.

ދިފާއީ ވުޒާރާއިން ބުނީ އޮޓޮމެޓިކް ޓޭކް-އޮފް އެންޑް ލޭންޑިންގ ރެކޯޑިންގ ސިސްޓަމްގެ ސަބަބުން ކޮންމެ ފަދަ މޫސުމެއްގައިވެސް މަތިންދާބޯޓުތައް ފުރުމާއި ޖެއްސުމުގެ މައުލޫމާތާއި ގާބިލްކަން ލިބި ވައިގެ ދަތުރުފަތުރުގެ ސަލާމަތްތެރިކަން އިތުރަށް ހަރުދަނާވާނެ ކަމަށެވެ.