ޔުނައިޓެޑް އެރަބް އެމިރޭޓްސް (ޔޫއޭއީ) އާއި އިންޑިޔާއާ ދެމެދުގެ ގުޅުން ގިނަ ދާއިރާތަކަކުން ބަދަހި ކުރުމަށް އެއްބަސްވެއްޖެއެވެ.

މިފަދައިން އެއްބަސްވެފައިވަނީ ޔޫއޭއީގެ ގެ ރައީސް ޝައިޚް މުޙައްމަދު ބިން ޒައިދު އަލް ނަޙްޔާން އިއްޔެ އިންޑިއާއަށް ކުރެއްވި ތިން ގަޑިއިރުގެ ކުރު ދަތުރުފުޅުގައެވެ. ޔޫއޭއީގެ ރައީސަށް އެއާޕޯޓުން މަރުހަބާ ދެންނެވީ އިންޑިއާގެ ބޮޑުވަޒީރު ނަރެންދުރަ މޯދީއެވެ. 

އެފަހުން ދެބޭފުޅުން އެކުގައި ބޭއްވުނު ބައްދަލުވުމުގައި، 2032 ވަނަ އަހަރާ ހަމައަށް ދެ ޤައުމުގެ ދެމެދުގައި ކުރެވޭ ވިޔަފާރީގެ މިންވަރު 200 ބިލިއަން ޑޮލަރަށް އިތުރުކުރުމަށް ވަނީ އަމާޒު ހިފާފައެވެ.

ދެ ލީޑަރުންގެ މަޝްވަރާތަކުގައި އެންމެ ބޮޑު އިސްކަމެއް ދީފައިވަނީ އިޤްތިޞާދީ ގޮތުން ދެ ޤައުމު އިތުރަށް ގުޅާލުމަށެވެ. 2022 ވަނަ އަހަރު ސޮއިކުރެވުނު އިޤްތިޞާދީ އެއްބަސްވުމުގެ (CEPA) ސަބަބުން، މިހާރު 100 ބިލިއަން ޑޮލަރުގައި ހުރި ވިޔަފާރި، ކުރިއަށް އޮތް ހަ އަހަރު ދުވަހުގެ ތެރޭގައި ދެގުނަ ކުރުމަށް ވަނީ ނިންމާފައެވެ.

ހަކަތައިގެ ދާއިރާއިން ވެސް މުހިންމު އެއްބަސްވުންތަކެއްގައި ވަނީ ސޮއިކޮށްފައެވެ. އެގޮތުން އިންޑިއާގެ އެޗް.ޕީ.ސީ.އެލް (HPCL) އާއި ޔޫއޭއީގެ އެޑްނޮކް (ADNOC) ގޭސްއާ ދެމެދު ވެވުނު އެއްބަސްވުމުގެ ދަށުން، 2028 ވަނަ އަހަރުން ފެށިގެން 10 އަހަރުގެ މުއްދަތަށް އަހަރަކު 0.5 މިލިއަން ޓަނުގެ އެލް.އެން.ޖީ (LNG) އިންޑިއާއަށް ފޯރުކޮށްދޭނެއެވެ. މީގެ އިތުރުން ގުޖުރާތުގެ ދޮލޭރާ ޚާއްޞަ އިންވެސްޓްމަންޓް ސަރަޙައްދުގައި ބައިނަލްއަޤްވާމީ އެއާޕޯޓަކާއި ބަނދަރެއް ތަރައްޤީކުރުމަށް ވެސް ވަނީ އެއްބަސްވެފައެވެ.

މި ދަތުރުފުޅުގެ އެންމެ ފާހަގަކޮށްލެވޭ އެއް ނިންމުމަކީ ދެ ޤައުމުގެ ދެމެދުގައި "ސްޓްރެޓީޖިކް ޑިފެންސް ޕާޓްނަރޝިޕް ފްރޭމްވޯކް" އެއްބަސްވުމެއްގައި ސޮއިކުރުމެވެ. މީގެ ދަށުން ދިފާޢީ ސިނާޢަތްތަކުން ގުޅިގެން މަސައްކަތް ކުރުމާއި، ސައިބަރ ސެކިއުރިޓީ އަދި އަސްކަރީ ތަމްރީނުތައް ހިމެނެއެވެ. އިންޑިއާގެ ފޮރިން ސެކްރެޓަރީ ވިކްރަމް މިސްރީ ވިދާޅުވީ، މިއީ ދެ ޤައުމުގެ ގުޅުން ކުރިއަރަމުން އަންނަ ގޮތުން ވީ އެއްބަސްވުމެއް ކަމަށާއި، މީގެ ސަބަބުން ސަރަޙައްދީ އެއްވެސް ހަމަނުޖެހުމެއްގެ ތެރެއަށް އިންޑިއާ ވަދެގެން ނުދާނެ ކަމަށެވެ.

މި ބައްދަލުވުމުގައި ނިއުކްލިއަރ ހަކަތަ ބޭނުންކުރުމާއި، ފަޒާއީ ދާއިރާއިން ގުޅުން ބަދަހިކުރުމަށް ވެސް ވަނީ މަޝްވަރާކޮށްފައެވެ. މީގެ އިތުރުން "ޑިޖިޓަލް އެމްބަސީ" ތައް އުފެއްދުމުގެ ޚިޔާލާއި، ދެ ޤައުމުގެ ޕޭމަންޓް ސިސްޓަމްތައް ގުޅާލައިގެން ފައިސާގެ މުޢާމަލާތްތައް ފަސޭހަކުރުމަށް ވެސް ވަނީ އެއްބަސްވެފައެވެ.

ދެ ލީޑަރުން ވަނީ އިންޑިއާ-މިޑްލް އީސްޓް-ޔޫރަޕް އިކޮނޮމިކް ކޮރިޑޯ (IMEC) ކުރިއަށް ގެންދިއުމުގެ މުހިންމުކަން ފާހަގަކުރައްވައި، ޓެރަރިޒަމާ ދެކޮޅަށް ކުރާ މަސައްކަތްތަކުގައި ގުޅިގެން މަސައްކަތް ކުރައްވާނެ ކަމަށް ވިދާޅުވެފައެވެ. ބޮޑުވަޒީރު މޯދީ ވަނީ އިންޑިއާގެ އިންފްރާސްޓްރަކްޗަރ ފަންޑުތަކުގައި ބައިވެރިވުމަށް ޔޫއޭއީގެ އިންވެސްޓްމަންޓް އިދާރާތަކަށް ދަޢުވަތު އަރުވާފައެވެ.