އިނގިރޭސިވިލާތުގެ ބާރުގެ ދަށުގައި އޮތް ޗާގޯސް ޖަޒީރާ ރަށްތަކުގެ މިލްކުވެރިކަން މޮރިޝަސްއަށް ބަދަލުކުރުމަށް ވެފައިވާ އެއްބަސްވުމަށް އެމެރިކާގެ ރައީސް ޑޮނަލްޑް ޓްރަމްޕް ތާއީދުކޮށްފިއެވެ.

މިކަން ހާމަކޮށްފައިވަނީ އިނގިރޭސި ބޮޑުވަޒީރުގެ އޮފީސް، ޑައުނިންގް ސްޓްރީޓުން ބީބީސީއަށް ދިން މައުލޫމާތުގައެވެ.

މި އެއްބަސްވުމާ ގުޅޭގޮތުން ވާހަކަދައްކަމުން ރައީސް ޓްރަމްޕް ބުނީ، އިނގިރޭސި ބޮޑުވަޒީރު ސަރ ކިއަރ ސްޓާމަރ އެކުލަވާލި މި އެއްބަސްވުމަކީ "ހެދޭނެ އެންމެ ރަނގަޅު" އެއްބަސްވުން ކަމަށެވެ.

ނަމަވެސް މީގެ ކުރިން ޓްރަމްޕް ވަނީ އެ އެއްބަސްވުމަކީ "ބޮޑު މޮޔަކަމެއްގެ" ގޮތުގައި ސިފަކޮށް އެއަށް ފާޑުވެސް ކިޔައިފައެވެ. 

މިދިޔަ ބުރާސްފަތި ދުވަހު ދެ ގައުމުގެ ލީޑަރުންގެ މެދުގައި ދެކެވުނު ވާހަކަތަކުގައި، ޗާގޯސްގެ އެންމެ ބޮޑު ރަށް ކަމަށްވާ ޑިއޭގޯ ގާސިއާގައި އޮންނަ އިނގިރޭސި-އެމެރިކާގެ ގުޅިފައިވާ އަސްކަރީ މަރުކަޒުގެ ރައްކާތެރިކަން ކަށަވަރުކުރުމަށް މި އެއްބަސްވުން މުހިންމުކަން ވަނީ ފާހަގަކޮށްފައެވެ.

ޑައުނިންގް ސްޓްރީޓްގެ ތަރުޖަމާނަކު ބުނީ، މި އެއްބަސްވުން ތަންފީޒުކުރުމުގައި ދެ ގައުމުން ގާތުން މަސައްކަތްކުރުމަށް އެއްބަސްވެފައިވާ ކަމަށެވެ.

ރައީސް ޓްރަމްޕްގެ ސޯޝަލް މީޑިއާ ޕްލެޓްފޯމް 'ޓްރުތް ސޯޝަލް' ގައި ކުރި ޕޯސްޓެއްގައި އޭނާ ބުނެފައިވާގޮތުން، ބޮޑުވަޒީރު ސްޓާމަރާއެކު ބޭއްވުނު މަޝްވަރާތަކަކީ ވަރަށް ކާމިޔާބު މަޝްވަރާތަކެއް ކަމަށެވެ.

މިދިޔަ އަހަރު އިއުލާނުކުރި މި އެއްބަސްވުމުގެ ދަށުން، ޗާގޯސް ޖަޒީރާގެ އިސްތިގުލާލު މޮރިޝަސްއަށް ދޫކޮށްލި ނަމަވެސް، ޑިއޭގޯ ގާސިއާ ގައިވާ އެމެރިކާގެ އަސްކަރީ މަރުކަޒުގައި ހިންގާ އޮޕަރޭޝަންތަކަށާއި ސިފައިންނަށް އެއްވެސް ފަރާތަކުން ބިރުދައްކައިފިނަމަ، އެތަން ރައްކާތެރިކުރުމާއި ވަރުގަދަ ކުރުމުގެ މަސައްކަތް ކުރާނެ ކަމަށް ޓްރަމްޕް ބުނެފައިވެއެވެ.

މިދިޔަ މެއި މަހު އެއްބަސްވި މި ޑީލްގެ ދަށުން، އިނގިރޭސިވިލާތާއި މޮރިޝަސްގެ ސަރުކާރުން ގުޅިގެން އިއުލާނުކުރީ 60 އަށްވުރެ ގިނަ ރަށްތައް ހިމެނޭ ޗާގޯސްގެ ފުރިހަމަ ސިޔާދަތު އަނެއްކާވެސް މޮރިޝަސްއަށް ލިބޭނެ ކަމަށެވެ. މީގެ ބަދަލެއްގެ ގޮތުން ކުރިއަށް އޮތް 99 އަހަރަށް އެމެރިކާގެ އަސްކަރީ މަރުކަޒު އެތަނުގައި ހިންގުމުގެ ޔަގީންކަން ދީފައިވެއެވެ.