ޗާގޯސް އެއްބަސްވުމަށް ޓްރަމްޕް ތާއީދުކުރީ އެތަން މޮރިޝަސްއަށް ދިނުމަށް ނޫން ކަމަށް ވެދާނެ: ނަޝީދު
އިނގިރޭސިވިލާތުގެ ބާރުގެ ދަށުގައި އޮތް ޗާގޯސް ޖަޒީރާ ރަށްތަކުގެ މިލްކުވެރިކަން މޮރިޝަސްއަށް ދޭ ގޮތަށް އޮތް އެއްބަސްވުމަށް ޓްރަމްޕް ތާއީދު ކުރީ އެތަން މޮރިޝަސްއަށް ނޫން ކަމަށް ވުންވެސް އެކަށީގެންވާ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް ޓްރަމްޕް ޔޫކޭ-ޗާގޯސް އެއްބަސްވުމަށް އެއްބަސްވީ ޗާގޯސް މޮރިޝަސްއަށް ދިނުމުގެ ބޭނުމުގައި ނޫން ކަމަށް ވުން އެކަށީގެންވާ ކަމަށެވެ.
އެމަނިކުފާނު ފާހަގަކުރެއްވި ގޮތުގައި، މިހާރުގެ ހާލަތަށް ބަލާއިރު ދިވެހިރާއްޖޭގެ ދައުވާ ބަލަންޖެހޭ ކަމަށް އެމެރިކާއަށާއި އިނގިރޭސީންނަށް ބުނުމުގެ ފުރުސަތު އެބައޮތެވެ.
އަދި އެ ސަބަބަށްޓަކައި ޗާގޯސް މޮރިޝަސްއަށް ދެވެން ނެތް ކަމަށް ބުނުމުގެ ޖާގަވެސް އޮތް ކަމަށް ނަޝީދު ވިދާޅުވިއެވެ.
މީގެ އިތުރުން، ރާއްޖޭގެ ކޯސްޓްގާޑުން މިހާރު އަމަލުކުރަމުންދާ ގޮތަކީ އެމެރިކާ އާއި އިނގިރޭސިވިލާތުގެ ރުހުމާއެކު ކުރިއަށްދާ ކަމެއް ކަމަށް ވެދާނެ ކަމަށްވެސް ރައީސް ނަޝީދު ވަނީ ވިދާޅުވެފައެވެ.
އިނގިރޭސި ބޮޑުވަޒީރުގެ އޮފީހުން ބީބީސީއަށް މައުލޫމާތު ދީފައިވާ ގޮތުގައި، ރައީސް ޓްރަމްޕް ވަނީ ބޮޑުވަޒީރު ކިއަރ ސްޓާމަރ އެކުލަވާލި މި އެއްބަސްވުމަކީ "ހެދޭނެ އެންމެ ރަނގަޅު" އެއްބަސްވުން ކަމަށް ސިފަކޮށްފައެވެ. މީގެ ކުރިން ޓްރަމްޕް މި އެއްބަސްވުމަށް ފާޑުކިޔައި "ބޮޑު މޮޔަކަމެއް" ގޮތުގައި ސިފަކުރި ނަމަވެސް، އިއްޔެ ބޭއްވުނު މަޝްވަރާތަކުގައި ވަނީ ޑިއޭގޯ ގާސިއާގައި އޮންނަ އަސްކަރީ މަރުކަޒުގެ ރައްކާތެރިކަން ކަށަވަރުކުރުމަށް މި އެއްބަސްވުން މުހިންމުކަން ފާހަގަކޮށްފައެވެ.
ރައީސް ޓްރަމްޕް އޭނާގެ 'ޓްރުތް ސޯޝަލް' ގައި ބުނީ، އެމެރިކާގެ އަސްކަރީ މަރުކަޒަށް އެއްވެސް ފަރާތަކުން ބިރުދައްކައިފިނަމަ އެތަން ރައްކާތެރިކުރުމުގެ މަސައްކަތް ކުރާނެ ކަމަށެވެ. މި އެއްބަސްވުމުގެ ދަށުން 60 އަށްވުރެ ގިނަ ރަށް މޮރިޝަސްއަށް ދޭން ނިންމާފައިވީ ނަމަވެސް، ޑިއޭގޯ ގާސިއާގެ މަރުކަޒު ކުރިއަށް އޮތް 99 އަހަރަށް ބޭނުންކުރުމުގެ ޔަގީންކަން އެމެރިކާއަށް ވަނީ ލިބިފައެވެ.
ޗާގޯސް މައްސަލައިގައި ރާއްޖޭގެ މިހާރުގެ ސަރުކާރުން ވަނީ ހަރުކަށި ފިޔަވަޅުތަކެއް އަޅާފައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އިޓްލޮސްގެ ނިންމުން ގަބޫލުނުކުރައްވާ ކަމަށާއި، ޗާގޯސްގެ މައްޗަށް މޮރިޝަސްގެ އެއްވެސް ހައްގެއް ނެތް ކަމަށް ވިދާޅުވެފައެވެ. މިކަމާ ގުޅިގެން ރާއްޖޭގެ ދިފާއީ ވުޒާރާއިން ވަނީ ރާއްޖޭގެ ކަނޑުގެ ސަރަހައްދު ބެލެހެއްޓުމަށް އަސްކަރީ ޑްރޯންތަކާއި ކޯސްޓްގާޑު އުޅަނދުތައް ދެކުނުގެ ކަނޑުގެ ސަރަހައްދަށް ފޮނުވާފައެވެ.
Advertisement
This content is created and paid for by advertisers and does not involve Voice Journalists
