ރާއްޖޭން ގަބޫލުކުރާ ޓެރަރިސްޓް ޖަމާއަތްތަކުގެ ލިސްޓުން ސީރިއާގެ ވެރިކަންކުރާ ޖަމާއަތް ކަމަށްވާ ހަޔާތު ތަހްރީރް އަލް ޝާމް (އެޗްޓީއެސް) ޖަމާއަތުގެ ނަން އުނިކޮށްފިއެވެ.
މިއާއިއެކު، ރާއްޖެއިން ދަތުރުކުރުން މަނާވާ ހަނގުރާމަވެރި ސަރަހައްދުތަކުގެ ލިސްޓުން ވެސް ސީރިއާ ވަނީ އުނިކޮށްފައެވެ.
ރާއްޖޭން ގަބޫލުކުރާ ޓެރަރިސްޓް ޖަމާއަތްތަކުގެ ލިސްޓާއި ރާއްޖޭން ދަތުރުކުރުން މަނާވާ ހަނގުރާމަވެރި ސަރަހައްދުތަކުގެ ލިސްޓަކީ ކޮންމެ އަހަރަކު މުރާޖައާކުރަން ޖެހޭ ލިސްޓެކެވެ. އެގޮތުން، ޓެރަރިޒަމް މަނާކުރުމުގެ ގާނޫނުގައިވާ ގޮތުން، ނެޝަނަލް ސެކިއުރިޓީ ކައުންސިލްގެ ލަފާގެ މަތިން އެ ލިސްޓު މުރާޖައާކޮށް ރައީސް އޮފީހުން މިދިޔަ ބުރާސްފަތި ދުވަހު ސަރުކާރުގެ ގެޒެޓްގައި ވަނީ ޝާއިއުކޮށްފައެވެ.
2019 ވަނަ އަހަރުން ފެށިގެން ރާއްޖޭން ގަބޫލުކުރާ ޓެރަރިސްޓް ޖަމާއަތްތަކުގެ ލިސްޓްގައި އެޗްޓީއެސް ޖަމާއަތުގެ ނަން އޮވެއެވެ. އޭގަފަހުން، ސީރިއާގެ ކުރީގެ ރައީސް ބައްޝާރުލްއަސަދުގެ ވެރިކަން ވައްޓާލުމަށް ފަހު އެ ގައުމުގެ ވެރިކަމާ އެޗްޓީއެސް ޖަމާއަތުން، ޑިސެމްބަރު 2024ގައި ހަވާލުވެ، ޖެނުއަރީ 2025ގައި ރައީސަކު އައްޔަނު ކުރިފަހުން މިދިޔަ އަހަރު ލިސްޓް މުރާޖައާކޮށް ނެރުނުއިރު ވެސް ލިސްޓްގައި އެ ޖަމާއަތުގެ ނަން އޮތެވެ.
ޓެރަރިސްޓް ޖަމާއަތްތަކުގެ މި ލިސްޓުން ރާއްޖެއިންވެސް، އެޗްޓީއެސް ޖަމާއަތް އުނިކުރީ އެމެރިކާއިންނާއި ދުނިޔޭގެ އެހެން ގިނަ ގައުމުތަކުން ވެސް މިހާރު އެ ޖަމާއަތަކީ ޓެރަރިސްޓު ޖަމާއަތެއް ނޫންކަމަށް ދެކެމުންދާތީއެވެ.
Advertisement
This content is created and paid for by advertisers and does not involve Voice Journalists
