މާލެސިޓީގައި ފިތުރު އީދު ނަމާދު ހަތަރު މައިދާނެއްގައި ކުރިއަށް ގެންދަން ނިންމާފައިވާއިރު ބޮޑު ޖަމާއަތުގައި ޚަތީބު ކަން ކުރާނެ ބޭފުޅުންގެ މައުލޫމާތު އާންމުކޮށްފި އެވެ.

މާލެއާ ވިލިމާލެ އަދި ހުޅުމާލެ ދެ ފޭސް ގައިވެސް ބޮޑު ޖަމާއަތުގައި އީދު ނަމާދު ކުރުން އޮންނާނެ އެވެ. މާލޭގައި އޮންނާނީ މާފަންނު ސްޓޭޑިއަމްގަ އެވެ. ވިލިމާލެ ބޯޅަދަނޑުގަ އެވެ. އަދި ފޭސް އެކެއްގައި ސިންތަޓިކް ޓްރެކް ގައި ބޮޑު ޖަމާއަތް އޮންނާނެ އެވެ. ފޭސް ދޭއްގައި މަސްޖިދު ޙަސަން އާދަމްއާ ނިރޮޅުމަގާއި ހީނާހިނގުމާއި ފޭރުގަސްމަގާ ދުބުރިގަސް މަގާއި އެއް އިންކޮށް އޮންނަ ހުސްބިމުގައި ބޮޑު ޖަމާއަތުގައި އީދު ނަމާދު ކުރުމަށް ވަނީ ހަމަޖެހިފަ އެވެ.

އިސްލާމިކް މިނިސްޓްރީން މިއަދު ވަނީ ބޮޑު ޖަމާއަތުގައި ޚަތީބު ކަން ކުރާނެ ބޭފުޅުންގެ މައުލޫމާތު އާންމުކޮށްފަ އެވެ.

* މާފަންނު ސްޓޭޑިއަމްގައި ބޮޑު ޖަމާޢަތުގެ ޚަތީބު - އަލްޙާފިޘް އަބްދުالله ބިން އިމްޖާދު

* ވިލިމާލެ ބޮޑު ޖަމާޢަތުގެ ޚަތީބު - އަފްލާޙް އިސްމާއީލް ރަޝީދު

* ހުޅުމާލޭ ފޭސް އެކެއްގައި އޮންނަ ބޮޑު ޖަމާޢަތުގެ ޚަތީބު - އައްޝައިޚް އަހްމަދު މައުމޫން

* ފޭސް ދޭއްގެ ބޮޑު ޖަމާޢަތުގެ ޚަތީބު - އައްޝައިޚް އަބްދުالله ސަޢުދާން

އަދި އިސްލާމީ މަރުކަޒާއި ސަލްމާން މިސްކިތުގައި ވެސް އީދު ނަމާދު ކުރުން އޮންނާނެ އެވެ. މީގެ އިތުރުން މާލޭގައި އިތުރު 15 މިސްކިތެއްގައި ވެސް އީދު ނަމާދު ކުރުން އޮންނާނެ އެވެ.

ވިލިމާލޭގައި މަސްޖިދުއްސަލާމްގައި އީދު ނަމާދު ކުރާ ގޮތަށް ހަމަޖެހިފައިވާއިރު ހުޅުމާލެ ފޭސް އެކެއްގައި މަސްޖިދުއްޝަހީމް ޤާސިމް ބިން މުޙައްމަދު އާލް ޘާނީ އާއި މަސްޖިދު ރަޝީދު އާއި މަސްޖިދު ޢަޒީޒާ މޫސާ އާއި މަސްޖިދު އަޞްދިޤާ އާއި މަސްޖިދުލްވާލިދައިނި ގައި ޢީދު ނަމާދު ކުރާނެ އެވެ. ފޭސް ދޭއްގައި އީދު ނަމާދު އޮންނާނީ މަސްޖިދުލް ޢީމާން އާއި މަސްޖިދު ޢުޘްމާން ބިން ޢައްފާން ގަ އެވެ.

އީދު ނަމާދު ކުރަން ފަށާނީ ހެނދުނު 7:00 ގަ އެވެ. ކަލަންޑަރު ބުނާގޮތުން މި އަހަރު ފިތުރު އީދު ދުވަހަކީ އަންނަ ހުކުރު ދުވަހެވެ. ހަނދު ބެލުން އޮންނާނީ މިރެ އެވެ.