އިސްލާމީ ސަގާފަތާ ބީރައްޓެހި ކުޅިވަރުތަކަށް ޢީދުގައި ޖާގަނުދިނުމަށް މިއަދުގެ ޢީދު ޚުތުބާގައި ގޮވާލައިފިއެވެ.

މިއަދު ފާހަގަކުރަމުންދާ ބަރަކާތްތެރި ފިޠުރު ޢީދުގެ މުނާސަބަތުގައި އިއްވި ޢީދު ޚުޠުބާގައި ބުނީ، ޢީދު ދުވަހަކީ މާތް الله އަޅަމެންނަށް ދެއްވި ހިދާޔަތަށްޓަކައި އެކަލާނގެއަށް ޝުކުރުކޮށް، އުފާފާޅުކޮށް، ތަކުބީރުގެ އަޑު އުފުލަންޖެހޭ ދުވަހެއް ކަމަށެވެ. އަދި މުސްލިމުންގެ ޢީދުތައް ޒީނަތްތެރިކުރަންވާނީ ތަކުބީރުގެ މަތިވެރި ބަސްފުޅުތަކުންކަން ޚުޠުބާގައި ހަނދާންކޮށްދިނެވެ.

ޢީދުގެ އުފާ ފާޅުކުރުމުގައި ޝަރުޢީ މިންގަނޑުތަކުގައި ހިފެހެއްޓުމުގެ މުހިންމުކަން ފާހަގަކުރަމުން، ޚުޠުބާގައި ވަނީ އިސްލާމީ ރިވެތި އާދަކާދަތަކާ ނުގުޅޭ ކަންކަމުން ޢީދުގެ އުފާވެރިކަން ކިލަނބުވިޔަ ނުދިނުމަށް އެދިފައެވެ. އަދި ޢީދަކީ އެކަކު އަނެކަކާ ބައްދަލުވެ، ސަލާމްކޮށް، ތަހުނިޔާ ބަދަލުކޮށް، އެކުވެރިކަން އާލާކުރަންވީ ދުވަހެއް ކަމުގައި ބުންޏެވެ.

ޚުޠުބާގައި އިތުރަށް ވަނީ، ޢީދުގައި އެންމެ އިސްކަމެއްގެ ގޮތުން މާތް اللهގެ ޙައްޤުތައް އަދާކުރުމަށާއި، އެއަށްފަހު މައިންބަފައިންގެ ޙައްޤުތަކާއި ރަޙިމުގެ ގުޅުން ދެމެހެއްޓުމަށް ބާރުއަޅާފައެވެ.

އަދި ޙަސަދަވެރިކަމާއި ބައިބައިވުމުން ދުރުހެލިވެ، މުސްލިމް އަޚުންގެ މެދުގައި އޮންނަންޖެހޭ ލޯތްބާއި ކުލުނު އިތުރުކުރުމަށް ގޮވާލައި ފަޤީރުންނާއި މިސްކީނުން ޢީދުގެ އުފަލުގައި ބައިވެރިކުރުމަށްޓަކައި ފިޠުރު ޒަކާތް ނެރުމުގެ މުހިންމުކަންވެސް ހަނދާންކޮށްދީފައިވެއެވެ:

ހަމައެހެންމެ، ރަމަޟާން މަހަށްފަހުވެސް ނަމާދު ޤާއިމުކޮށް، އަޅުކަމުގައި ހީވާގިވުމަށާއި، ޝައްވާލު މަހުގެ ހަ ރޯދަ ހިފުމަށް ނަސޭހަތްތެރިވިއެވެ.

ޤައުމީ އަމާންކަން: ޤައުމުގެ ޞުލްޙަ މަސަލަސްކަމާއި އަމާންކަން ދެމެހެއްޓުމަކީ ކޮންމެ ފަރުދެއްގެ ވާޖިބެއްކަން ފާހަގަކުރައްވައި، އަމާންކަން ނެތް ތަނެއްގައި އެއްވެސް ހަމަޖެހުމެއް ނޯންނާނެކަން ބަޔާންކުރެއްވިއެވެ.

ޚުޠުބާ ނިންމާލާފައިވަނީ މުޅި އިސްލާމީ އުންމަތަށާއި ދިވެހި އުންމަތަށް ބާއްޖަވެރި ޢީދަކަށް އެދި ދުޢާކުރަމުންނެވެ.