ޔޫގަންޑާގެ އަސްކަރީ ވެރިޔާ އަދި އެ ގައުމުގެ ރައީސް ޔޮވެރީ މުސެވެނީގެ ދަރިކަލުން ޖެނެރަލް މުހޫޒީ ކައިނެރުގަބާ، ތުރުކީއާ އެކު އޮތް ޚާރިޖީ ގުޅުންތައް ކަނޑާލާނެ ކަމުގެ އިންޒާރު ދެއްވައިފިއެވެ.

އެކްސް ގައި ކުރެއްވި ޕޯސްޓެއްގައި އޭނާ ވިދާޅުވީ ކުރިއަށް އޮތް 30 ދުވަހުގެ ތެރޭގައި ތުރުކީއާ އެކު އޮތް ހުރިހާ ސިޔާސީ ގުޅުމެއް ކަނޑާލާނެކަމަށެވެ.

މި އިންޒާރާ އެކު ޖެނެރަލް މުހޫޒީ ވަނީ ތުރުކީގެ ސަރުކާރުގެ ކިބައިން ބޮޑު އަދަދެއްގެ ފައިސާ ދެއްކުމަށް ޑިމާންޑް ކުރައްވާފައެވެ. އޭނާ ވިދާޅުވި ގޮތުގައި މަޝްވަރާތައް ފެށުމަށްޓަކައި ވެސް ތުރުކީން މަދުވެގެން 1 ބިލިއަން އެމެރިކާ ޑޮލަރު ދައްކަން ޖެހޭނެއެވެ. އަދި ތުރުކީގެ އެމްބަސީ ބަންދުކޮށް، އެ ގައުމުގެ އެއާލައިންތައް ޔޫގަންޑާއަށް ދަތުރުކުރުން ވެސް ހުއްޓުވާނެ ކަމަށް އޭނާ ވަނީ ވިދާޅުވެފައެވެ.

މީގެ އިތުރުން، ތުރުކީއާ މެދު ނުރުހުން ފާޅުކުރައްވަމުން ޖެނެރަލް މުހޫޒީ ވަނީ ތުރުކީގެ އެންމެ ރީތި އަންހެނަކާ ކައިވެނި ކުރެއްވުމުގެ ޝައުގުވެރިކަން ވެސް ފާޅުކުރައްވާފައެވެ. މިފަދަ ޒާތީ އަދި ޚާރިޖީ އުސޫލުތަކާ ނުގުޅޭ ވާހަކަތަކުގެ ސަބަބުން ބައިނަލްއަގުވާމީ މައިދާނުގައި ގިނަ ބައެއްގެ ސަމާލުކަން މި މައްސަލައަށް ވަނީ ހުއްޓިފައެވެ.

މިއީ ޖެނެރަލް މުހޫޒީ މިފަދަ ހަރުކަށި އަދި މަސްރަހު ގޯސްވާ ފަދަ ވާހަކަތަކެއް ދެއްކެވި ފުރަތަމަ ފަހަރެއް ނޫނެވެ. މީގެ ކުރިން އިޓަލީގެ ބޮޑުވަޒީރު ޖިއޯޖިއާ މެލޯނީއާ ކައިވެނި ކުރުމަށްޓަކައި "ރަނުގެ" ގޮތުގައި 100 ގެރި ދޭނެ ކަމަށް ވިދާޅުވެ އޭނާ ވަނީ އެކްސްގައި ޕޯސްޓް ކުރައްވާފައެވެ.