ވެލާނާ އިންޓަރނޭޝަނަލް އެއާރޕޯޓަށް ދަތުރުކުރާ އެއަރލައިންތަކުގެ އަދަދު 41 އަށް އަރައިފި ކަމަށް، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް ( އެމްއޭސީއެލް ) ގެ ތަފާސްހިސާބުތަކުން ދައްކައިފިއެވެ.

މިއީ، މިދިޔަ އަހަރު ފަހުކޮޅާއި އަޅާބަލާއިރު 6 އެއާރލައިންގެ އިތުރުވުމެކެވެ.

މިނިސްޓްރީ އޮފް ޓޫރިޒަމްގެ ތަފާސްހިސާބުތަކުން ދައްކާގޮތުގައި، މިދިޔަ އަހަރު ފަހުކޮޅު ރާއްޖެއަށް ދަތުރުކުރަމުން ދިޔައީ 35 އެއަރލައިންއެކެވެ. އެ ގޮތުން، މިހާރު ރާއްޖެއަށް ދަތުރުކުރަމުންދާ 41 އެއަރލައިންތަކުގެ ތެރެއިން، 16 އެއަރލައިނަކީ އޭޝިއާގެ އެއަރލައިންތަކެވެ. މީގެ އިތުރުން، ޔޫރަޕުގެ 13 އެއަރލައިނަކާއި މެދުއިރުމަތީގެ 6 އެއަރލައިނެއްވެސް މި 41 އެއަރލައިންތަކުގެ ތެރޭގައި ހިމެނެއެވެ.

މެދުއިރުމަތީގެ ހަނގުރާމައާއި ގުޅިގެން ރައީސް ޑރ. މުޙައްމަދު މުޢިއްޒު އުފެއްދެވި ވަޒީރުންގެ ހާއްސަ ކޮމިޓީން އެންމެ ފަހަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރ އޮފް ޓްރާންސްޕޯޓް އަމީން ވިދާޅުވީ ރާއްޖެއަށް އަންނަ ޖެޓްތަކުގެ އަދަދު ވެސް ފާހަގަކޮށްލެވޭ ވަރަށް އިތުރުވަމުން ދާ ކަމަށެވެ.

މިނިސްޓަރ އަމީން އިތުރަށް ފާހަގަކުރެއްވި ގޮތުގައި، މާރިޗު މަހަށް އެކަނި ބަލާލިޔަސް ގާތްގަނޑަކަށް %125 އިން %130 އަށް ޖެޓް ހޭންޑްލިންގެ އަދަދު އިތުރުކުރެވުނެވެ. މާރިޗު މަހު 80 ޖެޓު ރާއްޖެ އާއިރު، މިހާރު އެ އަދަދު 190 އަށް އަރާފައިވާކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވި ގޮތުގައި، ރާއްޖޭގެ ވައިގެ ދަތުރުފަތުރު ހަމައެކަނި މެދުއިރުމަތީ ފްލައިޓްތަކަށް ބަރޯސާވެ އޮތް އޮތުން ބަދަލުކޮށް، ތަފާތު ސަރަޙައްދުތަކުން ދަތުރުތައް ގެނައުމަށް ސަރުކާރުން ހަރަކާތްތެރިވަމުން ދެއެވެ. އެ މަސައްކަތުގެ ތެރެއިން އެއަރ އިންޑިއާ، އެއަރ އޭޝިއާ، އެޑެލްވިސް އަދި ޓާކިޝް އެއަރލައިންގެ ދަތުރުތައް ވެސް އިތުރުކުރެވިފައިވާކަމަށް މިނިސްޓަރ ފާހަގަކުރެއެވެ. އަދި ކުރިއަށް އޮތް ހަފުތާތަކު ތެރޭގައި އެފްރިކާގެ އިތިއޯޕިއާ އެއަރލައިންސް އިން ރާއްޖެއަށް ދަތުރުތަށް ފަށާނެކަމަށް މިނިސްޓަރ ވިދާޅުވިއެވެ.

މެދުއިރުމަތީގެ ހަނގުރާމައާއި ގުޅިގެން ރާއްޖޭގެ ފަތުރުވެރިކަމުގެ ސިނާޔަތަށް ބޮޑެތި ގެއްލުންތަކެއް ލިބެމުންދާއިރު، ހަނގުރާމައިގެ އަސަރު ވީހާވެސް ކުޑަކުރުމަށް ސަރުކާރުން ދަނީ މަސައްކަތް ކުރަމުންނެވެ.